DILI, STLTIMORLESTE.com – Apoiu neebe United Nations Children (UNICEF) oferese ba Governu Timor Leste (TL), fo benefísiu ba sentru saude komunitaria, eskola no sentru komunitariu, hodi tulun fornese servisu neebe fiavel liu ba labarik no família sira.
Iha loron 14 Julhu 2026, UNICEF entrega sistema enerjia solar ida no hadia instalasaun bee no saneamentu iha Vila Maumeta, Atauro, iha ambitu projetu ida neebe finansia husi KOICA– programa Asaun Klimatika ba Milla Ikus, kobre labarik-sira neebe mak vulneravel liu.
Liu husi komunikadu neebe mak STL simu husi media UNICEF Kuarta nee (15/07/2026) hatete, melhoramentu hirak nee fo benefísiu ba sentru saude komunitaria, eskola no sentru komunitáriu ka sede suku, hodi tulun fornese servisu neebe fiavel liu ba labarik no família sira. Projetu nee responde ba dezafiu neebe mak akontese ba tempu naruk, neebe kauza husi falta enerjia eletrisidade iha ilha Atauro. Sistema solar foun nee fornese enerjia kontinua ba kuidadu saude, edukasaun no servisu komunitariu sira, enkuantu hadia instalasaun bee no saneamentu sira suporta kondisaun neebe saudavel no seguru liu.
Prezidente Autoridade Administrativa Atauro, Mateus Belo hatete, projetu nee lori ksolok ba komunidade. Tanba povu sente orgulhu atu haree mudansa hirak nee sai realidade no iha esperansa.
“Ita haree ona katak projetu nee lori ksolok ba komunidade. Ita-nia povu sente orgulhu atu haree mudansa hirak nee sai realidade no iha esperansa kona-ba saida mak ida nee nia signifikadu ba futuru. Asesu neebe fiavel ba eletrisidade no bee no servisu publiku neebe diak liu, fo oportunidade boot-liu ba ita-nia oan no família-sira atu hetan susesu,” dehan nia.
Reprezentante Pais UNICEF iha Timor Leste, Patrizia DiGiovanni hatete, investimentu hirak nee importante liu-liu iha TL, iha neebe inundasaun, bai-loron naruk no perigu sira seluk neebe relasiona ho klima kontinua estraga servisu esensial sira.
“Investimentu hirak nee importante iha TL, iha neebe inundasaun, bai-loron naruk no perigu sira seluk neebe relasiona ho klima kontinua estraga servisu esensial sira. Ho halo eskola, fasilidade saude no sistema bee-moos sira sai reziliente liu, ami ajuda labarik no família-sira atu kontinua asesu ba servisu hirak nee, maske iha situasaun emerjensia,” dehan nia.
Nunee mos Diretora KOICA Timor Leste, Youn Hwa Kang dehan, projetu nee laos deit atu entrega infraestrutura. Nee hanesan investimentu ida iha komunidade-sira neebe saudavel liu, família sira neebe forte liu, no futuru neebe naroman liu ba labarik-sira iha TL.
“KOICA nafatin iha komitmentu atu servisu hamutuk ho Governu Timor-Leste no UNICEF hodi harii komunidade reziliente,”nia tenik.
Komunikadu nee haktuir, investimentu hirak nee sei ajuda komunidade-sira atu hasoru efeitu husi mudansa klimátika, inklui inundasaun no bai-loron naruk, no ms asegura asesu ba servisu esensial-sira. Fornesimentu eletrisidade neebe fiavel sei suporta armazenamentu vasina, prestasaun saude no aprendizajen, no mos hamenus dependensia ba fonte eletrisidade neebe karun liu no la fiável. Projetu nee implementa iha munisípiu haat mak Dili (Hera), Atauro, Lautem no Viqueque.
(dom)
