DILI, STLTIMORLESTE.com – Primeiru Ministru (PM), Kay Rala Xanana Gusmão hatete, daudaun nee Governu foti ona desizaun oinsa kombate jogu online iha rai laran liu husi seguransa halo daudaun kapturasaun no detein ona.
Primeiru Ministru, Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika (PR), Jose Ramos Horta iha Palasiu Prezidensial Nicolau Lobato, Bairo Pite, Kinta (16/07/2026).
PM hatete, Governu foti ona politika atu kombate jogu online ilegal iha rai laran.
Primeiru Ministru hatete, luta Governu nia nee tama ona iha faze implementasaun liu husi hametin seguransa ho sistema intelejensia, tanba daudaun nee kaptura ona sidadaun entranjeiru neebe involve iha kazu Jogu online.
“Jogu online ita boot temi tok mai saida mak akontese, saida mak akontese ona. Parte Governu halo saida ita boot mak fo sai notisia ba Timor tomak akontese ona saida, detein ona,” dehan Primeiru Ministru Kay Rala Xanana Gusmão.
Primeiru Ministru hatete, Governu fo prioridade makaas atu luta kontra jogu online ilegal neebe daudaun nee buras iha Timor Leste, no daudaun nee parte seguransa konsege detein ona sidadaun entranjeiru balun neebe involve iha atividade refere.
Numeru Jogu Online neebe kada loron kontinua sae, ida nee mak atu prevene, “imi fo sai informasaun ba publiku nee, imi fo sai deit publiku dehan hau atu husu ba imi nia kbiit analiza kapasidade informa iha neeba nee dehan katak sei enkontru hela hamutuk koordena ho embaixada Indonezia los ka lae? entaun mai husu fali hau halo saida, buat sira nee tau ona iha neeba akontese tan katak atu reforsa seguransa nee,” katak PM Xanana.
Atu kombate jogu online ilegal iha rai laran mak presiza reforma iha intelejensia, tanba politika ida nee klaru ona ho lei, tanba nee bainhira akontese jogu online sei haforsa iha seguransa hodi halo atuasaun ba kazu refere iha rai laran.
“Kontinua reforsa iha seguransa nunee bele halo kaptura ba sidadaun neebe involve iha jogu online nee,” katak PM Xanana.
Xefe Governu hatutan tan katak, politika Governu nia liga ho kazu nee foti ona desizaun, tanba nee taka ona iha fatin balun, tanba nee husu forsa seguransa kontinua halao servisu hodi bele kaptura sidadaun neebe involve iha kazu refere.
(eme)
