DILI, STLTIMORLESTE.com – Primeiru Ministru (PM), Kay Rala Xanana Gusmão hatete, nia seidauk haree asuntu konaba atu halo estatua Saudozu Eis Prezidente Republika, Francisco Guterres Lu olo.
Primeiru Ministru, Kay Rala Xanana Gusmao hatoo kestaun nee ba jornalista sira bainhira remata halo enkontru semanal ho Prezidente Republika, Jose Ramos Horta, iha Palasiu Prezidensial Nicolau Lobato, Bairo Pite, Kinta (16/07/2026).
Primeiru Ministru hatete, daudaun nee seidauk haree ba asuntu atu halo estatua saudozu Lu Olo nia tanba sei Governu sei tau prioridade ba assuntu seluk.
“Ida nee seidauk haree tanba ita iha prioridade ba 2029, prioridade Governu nia prioridade nee saida mak bele hasae ba rai ida nee, tanba sei halo hela Bispo sira bee uluk mai ama nia aman no inan sei kiik seidauk koinese malu Amo Dom Martinho nia isin ruin mos sei mai ita halo dadaun nee prioridade tan, prioridade tan intende prioridade nee saida,” katak PM Xanana.
Prezidente Parlamentu Nasional, Mari Fernanda Lay hatete atu halo Saudozu nia estatua tau iha Parlamentu Nasional ida nee inisiativa tenke mai husi ema ruma, tanba PN nuudar orgaun kolejial labele halo desizaun mesak.
Prezidente PN hatete, atu harii estatua ba Saudozu Francisco Guterres Lu Olo iha area Parlamentu Nasional nian sei presiza iha proposta ka inisiativa husi parte ruma atu bele diskute iha orgaun lejislativu nee, desizaun importante sira tenke mai husi prosesu institusional, laos husi ema ida deit.
Antes nee Prezidente Republika Jose Ramos Horta hatete, Saudozu Francisco Guterres Lu Olo merese hetan omenajen ho estatua iha Parlamentu Nasional tanba nia papel boot hanesan Prezidente Asembleia Konstituinte neebe lidera prosesu hahu elaborasaun no aprovasaun Konstitu-isaun RDTL tanba nee merese halo nia estatua tau iha Parlamentu Nasional maibe presiza haree fatin lai tanba Parlamentu Nasional oin kloot.
Prezidente Republika hatete, nia apoiu ema neebe hatete atu halo estatua Saudozu Lu Olo nia estatua 100% ideia atu harii estatua Lu Olo iha Parlamentu Nasional, tanba Lu Olo figura ida husi fundador Estadu TimorLeste.
“Hau hanoin ideia diak ida. Saudozu Francisco Guterres Lu Olo nia mak Prezidente Asembleia Konstituinte neebe hahu prosesu hadia ita nia Konstitu-isaun. Hau konkorda harii nia estatua iha Parlamentu Nasional,” dehan PR Ramos.
Xefe Estadu haktuir tan katak, Saudozu eis Prezidente Republika Francisco Guterres Lu Olo nia kontribuisaun makaas ba prosesu harii Estadu Timor Leste.
(eme)
