DILI, STLTIMORLESTE.com – Ministeriu Edukasaun (ME) liu husi Unidade Kurrikulu Nasional kontinua imprimi livrus iha sentru impresaun.
Lia hirak nee hatoo husi Koordenador Gabinete Unidade Kurrikulu Nasional iha ME, João Mau Pelu ba STL iha ME Kinta nee (16/07/2026).
“Primeiru livrus ita sei halo impresaun, balun ita distribui tiha ona, tanba livrus ba setimu ano nian ita distribui hotu ona, ba terseiru siklu setimu ano ita distribui hotu ona, nee kuaze kada disiplina ita imprimi 27 mil, nee ita kalkula kuaze besik too ita nian estudantes ida-idak, maibe karik ita nian eskola balun seidauk too ou seidauk kobre ba ita nian estudantes ida-idak, ita husu ba eskola atu halo jestaun,” nia informa.
Nia dehan, konaba livrus nee husu ba eskola ida-idak oinsa halo jestaun neebe mak diak, oinsa estudantes sira bele impresta livru sira nee lori ba grupu ida rua bele uza hamutuk halo diskusaun, tanba oinsa sira bele estuda hamutuk, nee para estudantes bele uza didiak, iha momentu professor atu hanorin nee estudantes grupu uza livru nee, depois profesor hanorin nee diak tebes.
“Ba oitavu ano ita fim do ano ita sei Imprimi 27 mil kada disiplina, iha des disiplina nee, la inklui relijiaun, des disiplina nee kada livru ita Imprimi 27 mil, ita nian planu nee sei minimu, nee kobre ona minimu estudantes ida livru ida, maibe ida nee ita sei esforsu, karik la too hanesan ohin nee eskola halo jestaun grupu, mai impresta livrus nee uza,” katak nia.
Nia akresenta, husu ba maluk profesores sira, livrus neebe mak iha eskola fo ba estudantes atu uza karik la too uza em grupu, labele tau hela livrus nee iha biblioteka too livrus nee la uza deit, maibe diak liu halo jestaun estudantes sira uza, too tempu haruka estudantes sira entrega fali livru nee, atu nunee estudantes neebe pasa mai nee bele uza livru hirak nee ho diak,” dehan nia.
Iha fatin seluk, Diretor Eskola Sekundariu Jeral 10 de Dezembro Comoro, Manuel Verdial katak, konaba fasilidade meza no kadeira, inklui kaderneta eskolar ba estudantes sira sufisiente hela, laiha problema iha sira nian eskola, maibe difikuldade neebe sira enfrenta mak kona-ba livrus ba disiplina balun neebe too agora sei menus.
“Hau hanoin konaba fasilidade meza no kadeira sira nee laiha impaktu, konaba fasilidade hirak neebe mak hanesan ohin hau mensiona nee, kaderneta eskolar mos kompletu ona, laiha impaktu ba ida nee, livrus mak sei impaktu, maibe ita konsulta ona ho parte ME nasional iha parte lojistika ninia, liu-liu parte ida neebe mak halo distribuisaun ba livrus sira nee,.atu nunee bele kompleta ita nian livrus ba disiplina neebe mak sei menus nee,” dehan Diretor ESJ 10 de Dezembro Comoro, Manuel Verdial ba STL iha nia knaar fatin, Tersa nee (30/06/2026).
Nia dehan, livrus ba disiplina balun neebe sei menus, atu nunee bele halo preparasaun, tanba hanesan livrus ba disiplina lingua ingles nian no livrus ba disiplina seluk neebe too agora sei menus, nee ba oin presiza husu apoiu nafatin, atu nunee bele fasilita estudantes no profesores sira ho diak liu tan.
“Ami nian livrus ba lingua ingles, hau hanoin iha biblioteka nee balun sei menus, ami nian kaderneta kompletu hela, hanesan ohin hau dehan ona, ami nian kaderneta sira nee laiha problema,” nia dehan.
Nia dehan, livrus ba disiplina balun neebe sei menus, atu nunee bele halo preparasaun, tanba hanesan livrus ba disiplina lingua ingles nian no livrus ba disiplina seluk neebe too agora sei menus, nee ba oin presiza husu apoiu nafatin, atu nunee bele fasilita estudantes no profesores sira ho diak liu tan.
“Ami nian livrus ba lingua ingles, hau hanoin iha biblioteka nee balun sei menus, ami nian kaderneta kompletu hela, hanesan ohin hau dehan ona, ami nian kaderneta sira nee laiha problema,” nia dehan.
Liliana Sarmento hanesan estudante hatete, estudantes sira sempre asesu ba livrus neebe rai iha biblioteka, dala ruma impresta lori ba uma, maibe tenke tau naran para bele rai fali livrus sira nee iha fatin.
“Ami estudantes sira sempre asesu ba livrus neebe rai iha biblioteka, dala ruma Impresta lori ba uma, maibe tenke tau naran para bele rai fali livrus sira nee iha fatin,” afirma nia.
(jac)
