DILI, STLTIMORLESTE.com – Eskola Sekundáriu Jeral 10 de Dezembro Comoro, halo hela reabilitasaun ba sala ualu (8), neebe lori konsesaun eskolar hahu reabilita daudaun ona.
Lia hirak nee hatoo husi Diretor ESJ 10 de Dezembro Comoro, Manuel Verdial ba STL iha nia knaar fatin Kinta nee (16/07/2026).
“Ita nian kondisaun infraestrutura iha nee, sala balun neebe ita agora reabilita dadaun ona, nee mak ita nian sala ualu, neebe ita hadia ninia janela, odamatan no seluk tan, nee ita rezolve dadaun ona ho ita nian osan konsesaun eskolar ninia, tanba KE nee governu liu husi ME fo ba ita, ita bele resposta ona buat balun iha ita nian eskola,” dehan Verdial.
Manuel dehan, sala ualu nee durante nee estudantes sira uza ba prosesu ensinu aprendizajen, agora dadaun hadia hela, tanba eskola ida nee estudantes husi eskola rua mak uza, ensinu baziku no ensinu sekundariu jeral mak uza, EBC dader no estudantes sekundariu sira tama meudia.
“Konstruksaun boot mak ita bele hein orsamentu boot, maibe ida Kiik hanesan hadia odamatan no janela nee lori konsesaun eskolar nee ita bele rezolve dadaun ona, tanba osan ida nee atu ezekuta tuir nesesidade husi eskola ida-idak nian,” nia esklarese
Iha fatin la hanesan Direitor Servisu Eduksaun Munisípiu Ainaro, Patricio da Costa Magno hatete, eskola balun neebe lokaliza iha Munisípiu Ainaro, balun sei menus sala de aula, maibe husi SEM Ainaro koko tau iha planu Ministériu Eduksaun (ME).
“Konaba edukasaun nee, buat barak maka ita nian eduksaun sira koalia, primeiru ita liga ba iha infraestrutura ita nian eskola barak iha sala de aula too agora sei menus, tanba nee ita Koko tau iha planu Ministériu nian, ho nunee ita bele rezolve oituan, atu nunee bele aumenta sala de aula ba Ita nian estudantes sira,” katak nia.
Nia dehan, eskola sira iha area remotas balun too agora sala de aula menus, no kondisaun eskola presiza halo reabilitasaun no halo konstruksaun foun, maibe ida nee presiza tau iha planu, hodi bele rezolve asuntu ida nee.
“Ita nian sala de aula iha eskola balun sei menus, oinsa mak ba oin atu ba aumenta sala de aula ba ita nian estudantes sira, hodi fasilita Ita nian estudantes sira iha prosesu ensinu aprendizajen ba Ita nian estudantes sira,” nia komenta.
Entretantu Superintendente Edukasaun Munisípiu Dili, Cesarina C. Guterres hatete, eskola balun presiza halo reabilitasaun no balun halo konstruksaun foun, ho nunee bele aumenta sala de aula ba estudantes sira, tanba eskola balun presiza aumenta sala aprendizajen ba estudantes sira, tanba eskola balun sei menus sala.
“Ita nian eskola balun presiza halo reabilitasaun no balun halo konstrusaun foun, ho nunee bele aumenta sala de aula ba estudantes sira, tanba eskola balun presiza aumenta sala aprendizajen ba estudantes sira, tanba eskola balun sei menus sala,” katak nia.
Nia aumenta, eskola balun reabilita sala de aula,hodi bele fasilita diak liu estudantes sira iha ensinu aprendizajen, tanba nee,eskola balun sala sufisiente ona, maibe balun presiza reabilita no halo konstruksaun foun.
(jac)
