DILI, STLTIMORLESTE.com – Ekipa konjunta kompostu husi Komponente Naval no Unidade Polisia Maritima (UPM) inklui Autoridade Protesaun Sivil (APC) halao operasaun no deteta restu mortais balun iha Laleia, Munisipiu Manatuto.
Tuir nota komunikadu imprensa neebe STL asesu husi media komponente Naval, husi F-FDTL iha Kinta feira (16/07) katak, iha loron dahuluk operasaun, ekipa konjunta halao buska no salvamentu iha tasi balak Laleia ho apoiu husi komunidade peskador. Maibe, operasaun nee la konsege hetan rezultadu.
Maibe iha loron tuir mai, operasaun la bele kontinua tanba kondisaun tasi boot. Maski nunee, drone neebe uza husi PNTL-UPM deteta lafaek mean ida besik tasi ibun, tanba nee deside hamate lafaek refere.
Hafoin oho, ekipa deside koa lafaek refere no hetan restu mortais balun iha laran.
“Bainhira loke nia kabun hetan restus mortais suspeitu balun, hanesan liman kukun, ain kukun, ruin malun no boraxa neebe vitima uza iha liman,” haktuir nota komunikadu nee.
Aleinde nee ekipa konjunta entrega kedas restus mortais nee ba autoridade kompetente atu halao investigasaun no teste DNA hodi konfirma identidade.
Enkuantu komunidade Manatuto no Laleia hamutuk ho autoridade relevante sei kontinua buka tanba restus mortais seidauk kompletu.
(alb)
