DILI, STLTIMORLESTE.com – Delegasaun husi Konselhu Reprezentante Rejional Indonezia (DPD RI) husi Provínsia Bali konvida Prezidente Republika (PR), Jose Ramos Horta halo abertura ba atividade loke eventu kolaborativu iha area negosiu no kultural iha Bali.
Bainhira remata hasoru malu, Shri I Gusti Arya Wedakarna, Mahendratta Wedasteraputra Suyasa III, SE., M (T. Ru) M.si Senator Indonezia DPD- MPR-RI ba jornalista iha Palasiu Prezidensial Nicolau Lobato Bairru Pite Kuarta (15/07/2026) hatete, ohin mai halo enkontru ho Prezidente Republika Jose Ramos Horta hodi deskute hamutuk oinsa hametin ligasaun people-to-people (ema ba ema) no kooperasaun bilateral. Iha biban nee konvida mos Prezidente hodi halo abertura ba atividade kolaborativu iha area negosiu no kultural iha Bali.
“Ami husi delegasaun husi Konsellu Reprezentante Rejional Indonezia (DPD RI) husi Provínsia Bali, mai hasoru Prezidente Republika ida nee ba dala tolu ka dala haat ona no ikus mak ami hasoru iha inaugurasaun ba Primeiru Ministru iha hasoru malu nee hau mos iha promesa ida ho Prezidente katak ami iha Bali iha atividade ida konaba ligasaun forum, no ami ohin fo ona konvite ofisial fulan oinmai hodi loke eventu kolaborativu iha area negosiu no kultural. ba hametin ligasaun people-to-people (ema ba ema) no kooperasaun bilateral,” katak nia.
Iha ahsoru malu nee halo Dialogu produtivu foka liu ba inisiativa konkreta atu apoia pos-integrasaun Timor-Leste nian iha ASEAN, hodi destaka interese hanesan iha area turizmu kualidade, dezenvolvimentu negosiu, no edukasaun.
Delegasaun Bali neebe inklui reprezentante sira husi setor ospitalidade, propriedade, agrikultura no akademiku, elojia relasaun forte neebe eziste ona, hodi nota katak sidadaun Timor-Leste liu nain 100.000 mak vizita Bali tinan-tinan no estudante liu nain 500 mak dadaun nee kontinua sira-nia edukasaun superior iha provínsia nee.
Durante enkontru nee, delegasaun ho formal hatoo konvite ba Xefe Estadu atu vizita Bali iha fulan oinmai hodi loke eventu kolaborativu iha area negosiu no kultural.
Hodi destaka reputasaun internasional Prezidente Ramos Horta nian neebe aas nuudar Laureadu Nobel ba pas, líder neebe hametin unidade, no figura espiritual neebe respeitadu, delegasaun fo sai katak maizumenus CEO no emprezariu Indonezia nain-500 mak ho laran-manas prepara hela atu simu nia.
Vizita neebe antisipa nee espera atu hametin liutan relasaun sosiuekonomika no diplomatika neebe forte entre Timor-Leste no Indonezia.
(eme)
