DILI, STLTIMORLESTE.com – Fundasaun Alola liu husi apoiu Bendigo Maubisse Friendship Committee (BMFC) Australia nuudar parseria internasional, selebra akordu bolsa estudu ho joven hamutuk 17 husi Suku Maubisse Vila, Munisípiu Ainaro.
Joven sira nee sei tuir treinamentu tékniku iha area hospitalidade iha Sentru Nasional Empregu no Formasaun Profesional (CNEFP) Tibar.
Serimonia asina akordu nee realiza iha edifísiu temporariu Fundasaun Alola nia (CBD 10 Timor Plaza) no hetan akompanamentu husi Autoridade Lokal Suku Maubisse Vila, Gerente Programa Edukasaun Alola, no Diretor CNEFP Tibar.
Gerente Programa Edukasaun Fundasaun Alola, Nuni Nobre esplika, seluk husi apoiu ba sekundaria no universidade, iha tinan nee BMFC komesa haluan sira nia hanoin hodi fo atensaun boot liu ba treinamentu vokasional.
“Durante tinan barak ami jere bolsa ba sekundária no universidade, maibe ami haree katak graduadu universidade sira dala ruma hetan servisu kleur oituan. Husi observasaun, formasaun hanesan iha Tibar fo oportunidade lalais liu ba foinsae sira atu asesu ba merkadu trabalhu,” dehan nia liu husi komunikadu neebe STL asesu busi media FA, Kuarta (22/07/2026).
Nia husu ba benefisiariu sira atu aproveita oportunidade nee ho masimu hodi bele sai referensia diak ba alin sira seluk iha Maubisse.
Iha fatin hanesan, Diretur CNEFP Tibar, Jose Simão Tito Barreto, hatoo ninia agradesimentu ba Fundasaun Alola no doador BMFC no afirma katak CNEFP Tibar sempre nakloke odomatan ba foinsae TL.
“TIBAR nia portaun sempre nakloke ba programa sira neebe dedika ba foin-sae sira. Hau sujere ba alin sira, iha tempu agora dedika an ba area neebe imi hakarak hatene lai (Ospitalidade), haklean abilidade, para aban-bairua prontu tama iha mundu servisu,” dehan nia.
Nia hatutan, formasaun neebe fo husi CNEFP Tibar lao tuir Kualifikasaun Nasional husi Instituto Nacional de Desenvolvimento de Mão-de-Obra (INDMO) ba nivel 1 no 2, neebe garante katak formandu sira hetan abilidade pratika ho padraun nasional hodi responde ba presiza merkadu traballu.
Nunee mos Xefi Suku Maubisse Vila, Wilson Nivio Maria Pereira Mendonça, hatoo agradesimentu klean ba doador Bendigo Australia no Fundasaun Alola ba sira-nia apoiu liu-liu ba komunidade Maubisse nian.
“Hau husu ba estudante sira atu aproveita oportunidade ida-nee ho responsabilidade, disiplina, no komitmentu hodi kontribui fali ba dezenvolvimentu Maubisse no Timor-Leste tomak,” dehan Xefi Suku nee.
Iha biban nee mos, Ofisial Projetu Bolsa Estudu Alola, Triponio Verdial, entrega simboliku fundus apoiu neebe mai husi BMFC ba Xefi Suku Maubisse Vila hodi fasilita no suporta estudante nain 17 nee durante tuir kursu profisionál iha CNEFP Tibar.
Liuhusi programa nee, esperansa boot katak graduadu sira laos deit prontu atu servisu iha seitor turizmu no ospitalidade, maibe mos bele kria oportunidade servisu rasik (empreendedorizmu) hodi hamenus taxa dezempregu iha TL.
BMFC hanesan grupu amizade ida neebe estabelese husi povu Australianu hodi apoia komunidade iha Postu Administrativu Maubisse, Munisipiu Ainaro. BMFC sai hanesan parseiru servisu Fundasaun Alola nian iha programa edukasaun. Hahu 2015, liu husi Fundasaun Alola, BMFC oferese bolsa estudu hodi apoia estudante sekundaria nomos universitáriu neebe vulneravel husi família ho kondisaun ekonomia kbiit-laek. Ba tinan 2026, BMFC fornese bolsa estudu ba estudante universidade nain 15, estudante eskola sekundaria nain 97, nomos suporta estudante nain 17 tuir kursu vokasional.
(dom)
