DILI, STLTIMORLESTE.com – Tribunal Judisial Primeira Instansia Dili (TJPID) iha loron Kuarta nee (22/07/2026) liu husi despaisu ikus ba kazu Jogu Online Scamming Call Centre iha Bedois, deside aplika medida ba arguidu nain 7.
Iha despaisu Juiz nian nee, deside aplika ba arguidu nain 6 hanesan sidadaun Indonezia ho medida Proibisaun Auzensia, kausaun kada arguidu US$ 2000, no kontinua mantein medida Termo Indentidade Rezidensia (TIR) neebe antes nee iha ona.
Ba arguidu nain 1 husi nasaun Xina deskonfia hanesan jerente, Tribunal aplika medida Kausaun US$ 10.000, no medida Aprezentasaun Periodika semana ida dala ida, no mantein ho medida TIR neebe antes nee iha ona.
Tribunal mos fo prazu loron sanulu atu depozita kausaun neebe iha ba Tribunal, se la depozita mak Tribunal sei halo alterasaun husi medida kausaun ba iha medida Prizaun Preventiva.
Kausaun neebe arguidu sira depozita ba iha Tribunal hanesan garantia ida, banhira arguidu sira halai ses husi Timor, mak osan refere sei tama ba iha kofre estadu.
Prosesu nee prezide husi Juiz nain ida, Ministeriu Publiku reprezenta husi Prokurador Rafael Gusmão, arguidu sira hetan asistensia legal husi Advogadu Privadu, Octavio Cardozo.
Arguidu sira submete mai iha Tribunal hamutuk nain 7 no husi Ministeriu Publiku neebe reprezenta husi Prokurador Rafael Gusmão, promove sira ho krime, Jogu Ilisitu previstu iha artigu 322, Asosiasaun Kriminoza previstu iha artigu 188, Brankamentus Kapitais previstu iha artigu 313, no Burla Informatika previstu iha artigu 268 husi Kodigu Penal Timor Leste nian.
Rekorda katak, iha loron 19 fulan Julhu nee, Autoridade Seguransa kompostu husi Servisu Migrasaun (SM), Servisu Informasaun Polisia no Diresaun Servisu Investigasaun Kriminal (DSIK) dezmantela rede krime transnasional scammer online no asegura sidadaun estranjeiru nain 7 iha area Bedois Suku Becora.
Operasaun nee realiza hafoin ekipa Servisu Sekreta Servisu Migrasaun rekolha informasaun husi fontes akreditadu sira, no iha loron Sabadu nee konsege identifika atividade rede Scam Call Centre ida iha Area Bedois, Suku Becora, Postu Administrativu Cristo-Rei, Munisipiu Dili.
Iha operasaun nee ekipa servisu konsege prende objetu krime iha uma arendamentu ida neebe konsidera hanesan evidensia teknolojia dijital, inklui sidadaun Indonezia nain 6 (feto 3 mane 3) no Xinez mane 1 neebe aluga uma refere.
(ter)
