DILI, STLTIMORLESTE.com – Durante Tribunal Ferias Judisiariu hahu husi loron 1 fulan Agusto too iha loron 15 fulan Setembru, prosesu sira neebe normal sei suspende, maibe atende deit prosesu sira neebe ho kategoria urjente.
Juiz Administrador Tribunal Judisial Primera Instansia Dili, Yudi Pamukas deklara katak, Tribunal hahu ferias ona maibe prosesu sira neebe ho kategoria urjente kontinua lao.
“Iha nee Juiz por volta 15 pesoas, entaun ita fahe sira kada semana ida resin hanesan nee kaer prosesu urjente, hanesan prosesu krime nian mak primeiru interogatoriu, sumariu, arguidu prezu no prosesu sivil sira hanesan providensia kautelar,” dehan Juiz ba STL iha Tribunal Dili, Kaikoli, Tersa (04/07/2026).
Nia hatutan, Tribunal Dili hanesan sentru ho prosesu neebe barak, maibe ho Juiz nain 15 neebe iha, aumenta tan ho Juiz estajiadu sira neebe iha bele apoiu atu halao julgamentu ba prosesu sira neebe iha, nunee kontinua redus kazu pendente sira.
Nia esplika, konaba koletivu neebe antes nee iha sei kontinua mantein ho koletivu neebe iha, tanba iha prosesu kontinuasaun sira neebe lao hela. Tanba nee, hanesan Juiz Administrador nia papel sei distribui deit prosesu ba iha Juiz sira.
Iha fatin ketak, Jurista Jose Maria Guterres dehan, Ferias Judisiariu nee kada tinan ida dala ida ba autor Judisiariu sira.
“Ferias nee ba autor judisiariu sira hanesan Juiz, Prokurador no Defensor Publiku, maibe iha ferias nee iha nafatin parte turnu nian hodi atende kazu urjente,” dehan nia.
Nia afirma, kazu sira neebe urjente, Juiz turnu kontinua iha hodi atende, no mos Prokurador inklui Defensor neebe sai hanesan defeza.
(ter)
