DILI, STLTIMORLESTE.com – Tribunal Judisial Primeira Instansia Dili (TJPID) iha loron Tersa (04/07/2026) halao prosesu primeiru interogatoriu ba arguidu ho inisial EdCdS.
Arguidu lori mai iha Tribunal husi parte Ministeriu Publiku (MP) promove ho krime Arma Branka.
Iha prosesu primeiru interogatoriu nee, Juiz Turnu halo tiha identifikasaun ba arguidu, deside tama ba iha alegasaun husi MP no defeza arguidu nian.
Iha alegasaun Prokurador Domingos Barreto deklara katak, husu Tribunal atu aplika medida Aprezentasaun Periodika ba arguidu, hodi asegura prosesu investigasaun neebe sei lao hela.
Nunee mos defeza arguidu nian husu Tribunal atu aplika medida Termo Indentidade Rezidensia (TIR), tanba konsidera la iha indisus ba krime neebe MP promove mai iha Tribunal.
Rona tiha alegasaun, ikus mai Juiz deside aplika medida Aprezentasaun Periodika (AP) ba arguidu atu aprezenta aan iha eskuadra polisia neebe hela besik ba, fulan ida dala ida.
Prosesu nee prezide husi Juiz estajiadu nain ida, Ministeriu Publiku reprezenta husi Prokurador Domingos Barreto, arguidu hetan asistensia legal husi Advogadu Privadu nain ida.
Rekorda katak, akontesimentu iha loron 2 fulan Julhu tinan 2026, iha Kampu Alor, momentu neeba arguidu uza armas, tanba nee mak.Polisia detein hodi submete ba iha Tribunal.
(ter)
