DILI, STLTIMORLESTE.com — Polisia Nasional Timor Leste (PNTL) keta foka deit ba detensaun trabalhador kiik sira, maibe rede boot scammer online tenke kaer hotu, tanba sira mak iha negosiu nee nia kotuk.
Apelu nee hatoo husi Akademista Universidade Nasional Timor Lorosa’e (UNTL), Francisco da Silva, hodi responde ba asaun PNTL neebe durante nee detein ona trabalhador barak husi atividade ilegal fraude eletroniku nee.
“Ami haree polísia halo ona servisu diak hodi detein trabalhador sira, maibé nee labele sai solusaun permanente. Autoridade sira tenke foka mos ba ema boot ka nain ba negosiu scamming nee nia iha kotuk, tanba trabalhador sira nee balun sai vítima ka ema neebe buka moris deit,” hateten Francisco ba STL iha Díli, Kuarta nee (05/08/2026).
Nia salienta katak, atividade scamming online laos deit krime kiik, maibe envolve rede transnasional no kapital neebe boot, nunee presiza investigasaun klean hodi kaptura matenek nain sira.
Akademista UNTL nee apela mos ba Governu no instituisaun kompetente sira atu hametin kooperasaun internasional, hodi nunee labele estraga fali ema nia moris no halo Timor Leste sai fatin seguru ba sindikatu kriminozu sira.
Iha sorin seluk, Observador Polítika, Daniel de Oliveira Soares haktuir katak, kazu scamming online neebe buras daudaun nee lori hela ameasa boot ba seguransa nasional no imajen rai laran nia kredibilidade iha matan internasional.
“Ita tenke rekonhese katak, se autoridade seguransa la hatudu vontade polítika no asaun klean hodi tesi sai abut sindikatu nee too iha nia xefe boot sira, krime transnasional sira nee bele kontinua buras no estraga jerasaun foun nia futuru,” dehab Daniel
Daniel hatutan tan katak, presiza duni kampanha edukasaun no sensibilizasaun neebe intensu hosi Governu ba komunidade, atu nunee labele monu fásil ba oferta empregu falsu neebe lori sidadaun sira ba rai ketan ka envolve aan iha rede krime organizadu sira nee.
Entretantu tuir dadus husi autoridade seguransa, iha tempu balun liu ba PNTL konsege halo ona operasaun balun no kaptura sidadaun estranjeiru no lokal neebe servisu nuudar operador iha fatin operasaun scamming online iha kapital Dili no munisipiu balu. Maski nunee prosesu lei no investigasaun ba patraun prinsipal seidauk hatudu rezultadu neebe publiku hatene ho klaru.
(car)
