DILI, STLTIMORLESTE.com – Tribunal Judisial Primeira Instansia Dili (TJPID) iha loron Kuarta nee (05/08/2026) liu husi despaisu ba prosesu primeiru interogatoriu, deside aplika medida Aprezentasaun Periodika ba arguidu ho inisial SVN.
Arguidu submete mai iha Tribunal, no husi parte Ministeriu Publiku (MP) promove ho krime Furto Agravado.
Iha sala julgamentu laran Juiza turnu Maria da Silva Pinto halo tiha indentifikasaun no rona tiha arguidu nia deklarasaun, Juiza husu ba iha Ministeriu Publiku no parte defeza arguidu nian atu ba iha alegasaun.
Iha alegasaun nee, Prokuradora Deonizia solisita ba iha Juiza turnu atu aplika medida Prizaun Preventiva ba iha arguidu.
Enkuantu husi parte defeza neebe reprezenta husi Defensor Publiku, Henrique Mariz, solisita ba iha Juiza turnu atu aplika medida Aprezentasaun Periodika ba iha arguidu.
Depois rona tiha alegasaun, ikus mai Juiza turnu liu husi despaisu ikus, deside aplika medida Aprezentasaun Periodika ba arguidu, atu aprezenta aan iha Tribunal fulan ida dala rua, hodi hein prosesu investigasaun neebe sei lao hela nee.
Prosesu nee prezide husi Juiza turnu Maria da Silva Pinto, Ministeriu Publiku reprezenta husi Prokuradora Deonizia, arguidu hetan asistensia legal husi Defensor Publiku Henrique Mariz.
Rekorda katak, arguidu detein iha Bekora iha loron 03 fulan Agostu tinan 2026, tanba ho kondisaun lanu tenta naok telefone.
Tanba nee mak komunidade sira kontaktu ba iha Polisia, no ikus mai detein arguidu.
(ter)
