DILI, STLTIMORLESTE.com — Realidade katak fundu Estadu nian neebe gasta milhaun ba milhaun ba projetu infraestrutura liu husi instalasaun lampu trafiku iha kapital Dili sai hanesan deit hias fatin, tanba too agora lampu merah iha Kolmera besik Igreja Katedral mate permanente no la funsiona ho diak.
Tuir observasaun iha terrenu hatudu katak, tian no kixaun lampu trafiku nee matan hakmatek deit no laiha sinalizasaun ruma neebe hodi regula movimentu transporte. Kondisaun nee obriga kareta no motorizada sira tenke halai tuir sira nia hakarak rasik, maski iha interseksaun neebe perigu.
Observasaun iha terenu mos hatudu klean katak problema lampu trafiku nee laos deit akontese iha Kolmera besik Katedral, maibe mosu mos iha fatin seluk neebe stratejiku hanesan iha area Balide, neebe lampu trafiku sura mos mate permanente no la fo ona sinal ba maluk sira neebe uza dalan publiku.
Kondisaun hirak nee hatudu duni katak investimentu publiku neebe boot ba sistema sinalizasaun moderna lakon nia funsaun real, hodi husik hela motorista no ema lao ain sira moris iha perigu laran iha kruzamentu sira neebe sirkulasaun trafiku kmaan too todan.
Motorista balun neebe liu husi fatin nee kestiona tebes situasaun nee, tanba lampu trafiku nee mate naruk ona bele fo impaktu negativu no aumenta perigu ba asidente trafiku, liu-liu ba ema lao ain sira neebe buka atu liu dalan iha area neebe.
“Lampu merah nee la funsiona durante nee bele fo impaktu ba asidente trafiku ba movimentu transporte no ema lao ain sira, tanba ema halai saruntu de’t,” hateten motorista, Mariano de Jesus ba STL iha Dili, Kuarta nee (05/08/2026).
Motorista nee husu ba entidade kompetente liu-liu Diresaun Nasional Transportes Terrestres (DNTT) atu tun haree lalais no halo manutensaun urjente ba lampu trafiku nee, hodi nuneee bele garante seguransa no disiplina trafiku nian iha kapital Dili.
Entretantu sidadaun ho naran Maria da Silva preokupa tebes ho kondisaun nee, hodi hateten katak nia rasik sente tauk bainhira atu hakur dalan iha area sira neebe lampu merah mate, tanba movimentu sirkulasaun kareta no motorizada nian la iha orden no ameasa loos ema lao ain nia seguransa vida nian.
“Ita husu ba governu liu husi entidade kompetente atu labele husik de’it situasaun nee kontinua naruk, tanba nee ameasa direta ba ami ema lao ain nia seguransa bainhira atu hakur dalan loro-loron,” tenik Maria da Silva ho lian preokupadu.
(car)
