DILI, STLTIMORLESTE.com – Membru FALINTIL-Forsa Defeza Timor Leste (F-FDTL) nain 10 kompostu husi Komponente Terrestre nain 2, Komponente Naval nain 1, Komponente Aéreo nain 1, Forsa Apoiu Gerál nain 1 no Kuartel Jenerál nain 5, termina ona formasaun Finansa no Kontabilidade neebe halao iha Eiros.
Reprezentante Diretór Eiros Group, José R. M. Soares hatoo agradesimentu ba instituisaun F-FDTL neebe fo fiar ba Eiros Group hodi fasilita formasaun ho progama finansa no kontabilidade ba membru F-FDTL sira.
“Agradese ba F-FDTL neebe fo fiar ba Eiros Group hodi fasilita formasaun ba membru F-FDTL sira, objetivu prinsipal husi formasaun nee mak atu hasae kapasidade membru F-FDTL sira, liu-liu iha area jestaun osan no oinsa atu jere ho di’ak relatoriu finanseiru iha kontabilidade, hodi asegura transparénsia no responsabilidade iha jestaun finanseira instituisaun, finansa no kontabilidade mak pilar prinsipal ba instituisaun hotu-hotu. Tanba nee, importante tebes atu membru sira iha konhesimentu no abilidade neebe diak iha área ida nee,” hatete Reprezentante Diretór Eiros Group, José R. M. Soares ba jornalista sira iha salaun Eiros, Kuarta (05/08/2026).
Iha sorin seluk, Reprezentante Xefe Gabinete Xefe Estadu Maior Jenerál F-FDTL, Tenente Koronel Rui Soares hatoo mós agradesimentu ba Eiros Group neebe fo matenek, konhesimentu no fasilidade ba membru militár sira durante prosesu formasaun.
“Formasaun Finansa no Kontabilidade iha importansia boot ba instituisaun F-FDTL, tanba konhesimentu neebe membru sira hetan bele aplika iha unidade no fatin servisu ida-idak, liu-liu iha jestaun orsamentu, preparasaun relatoriu finanseiru, transparénsia, kontabilidade no responsabilidade institusionál, formasaun Finansa no Kontabilidade importante ba ita nia instituisaun, liu-liu iha F-FDTL, nunee Konhesimentu neebe imi hetan iha Eiros Group bele ajuda imi iha unidade ida-idak atu halo jestaun orsamentu ho diak, prepara relatóriu neebe diak, no kontribui ba transparénsia, kontabilidade no responsabilidade iha instituisaun,” nia esplika.
Nia koalia, enseramentu nee marka mos kompromisu hamutuk entre F-FDTL no Eiros Group iha esforsu atu hasae kapasidade no profisionalizmu membru militár sira, liu-liu iha area finansa no kontabilidade, hodi suporta jestaun institusional neebe efisiente, transparente no responsavel.
Entretantu serimonia enseramentu formasaun nee reprezenta husi Xefe Gabinete Xefe Estadu Maior Jenerál F-FDTL, Tenente Koronel Rui Soares, neebe akompana husi Tenente Koronel Graduadu Inf. UE Gregório Bernardo Correia Kapitaun Tenente António do Rosário, Kapitaun QQ Pinto no Xefe Seksaun Jenero F-FDTL Kapitaun Marquita da Cunha.
(jen)
