DILI, STLTIMORLESTE.com – Influensiador Indonezia ho Prezidente Republika (PR) Jose Ramos Horta promove Maratona Internasional Dili (DIM) 2026.
Komisaun Organizadora Eventu Korrida Maratona Internasional Dili konvida influensiadora nain tolu husi Indonezia hamutuk ho Prezidente Republika Jose Ramos Horta atu halo promosaun ba DIM, neebe sei realiza iha dia 08 Agostu 2026.
Iha biban nee Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Kuarta (05/08/2026) hatete, iha ambitu preparasaun ba Maratona Internasional Dili 2026, Prezidente Republika, Ramos Horta ho laran luak simu delegasaun ida husi influensiador konhesidu husi Indonezia, hanesan Yasmin Ananda, Violeta Putri, Jenni Ananda no Yurry.
Konvidadu hodi haforsa tema tinan nee nian, “Hadomi Ita-nia Ai-laran no Balada Fuik Sira,” kriador sira-nee sei uza sira-nia plataforma dijital atu hatudu Timor-Leste nia furak natural neebe orijinal tebes, eko-turizmu, no esforsu konservasaun vida balada fuik nian ba audiensia rejional neebe boot tebes.
Durante konferensia imprensa, Prezidente Ramos Horta agradese ba influensiador sira-nia apoiu, hodi sublina katak sira-nia vizita ajuda foti aas Timor-Leste iha nivel internasional. Xefe Estadu destaka katak maratona nee mak parte husi esforsu boot liu ba konektividade rejional iha tinan ida-nee, neebe mos inklui viajen krusa fronteira motor BMW nian husi Jakarta mai Dili no simeira boot ida neebe sei konta ho prezensa husi Laureadu Nobel Siensia sira.
Atu fo apoiu liu tan ba interkambiu dijital no kultural neebe kontinua buras nee, Prezidente Republika destaka nasaun nia infraestrutura kriativa neebe dezenvolve daudaun ho lalais no fo-hatene kona-ba fasilidade foun ho padraun mundial iha Dili hanesan estudiu gravasaun modernu neebe harii husi Raul Lemos neebe lakleur tan sei fo kbiit ba artista lokal no internasional sira atu produs konteudu ho kualidade aas direta husi Timor Leste.
Prezidente Republika, Jose Ramos Horta haktuir tan katak, nia parte kontente tebes ho prezensa husi influensiadora sira, tanba bele promove Timor Leste ba mundu.
“Hau esplika natureza Timor Leste ba sira, nomos atividade Maratona Internasional Dili. Sira kontente mai konhese Timor. Hau agradese tebes ba sira, sira mai ho inisiativa nomos konvida husi Komisaun Oragnizadora, sira mak halo programa lojístika sira nee hotu entaun konvida sira mai”, dehan PR Horta.
Iha fatin hanesan Diretor Eventu Korrida DIM, João Borel hateten, sira nain tolu nee aleinde halo promosaun ba DIM, sei halo mos promosaun ba fatin konservasaun sira iha Timor Leste, bazeia ba tema DIM tinan nee “Hadomi Ita-nia Ai-laran, Hadomi Balada Fuik Sira”.
Nunee mos influensiadora Yasmin Napper agradese tanba bele partisipa iha eventu neebe Prezidente Republika realiza kada tinan no envolve komunidade no haburas turizmu Timor Leste.
“Iha nee ami sei halo konten vlog ba fatin turizmu sira neebe iha Timor Leste, tanba gosta tebes ambiente Timor Leste. Ami mos sei halo vizita ba fatin konservasaun sira iha Timor Leste hodi haree animal fuik sira”, dehan Yasmin.
Nia haktuir, nia rasik mai Timor Leste ba datoluk ona no haree katak Timor nee nia natureza furak loos, sira bele esplora liu husi sira nia mídia sosial sira.
(eme)
