DILI, STLTIMORLESTE.com — Maski Ministeriu Obras Publika (MOP) implementa hela servisu alargamentu no reabilitasaun hodi redus engarrafamentu iha kapital, motorista no publiku kontinua kestiona kondisaun Rotunda Elemloi, tanba dalan neebe luan ona seidauk rezolve total problema, hodi halo macet sei naruk no kontinua sai dezafiu boot.
Tuir observasaun diretu iha terenu, sirkulasaun iha zona refere hatudu katak husi períodu dader, loraik, too kalan, movimentu karreta no motorizada sira hasoru difikuldade boot atu liu. Kondisaun nee provoka macet neebe naruk loron-loron.
Difikuldade nee hamosu preokupasaun hosi motorista no komunidade sira neebe uza dalan nee beibeik. Sira gasta tempu barak iha dalan laran hodi hein sirkulasaun neebe lao tarde, hodi rezulta movimentu transporte too tarde ba fatin neebe atu ba.
Kondisaun refere reflete katak esforsu alargamentu estrada neebe lao dadaun sei menus atu rezolve total problema sirkulasaun iha zona nee. Tan nee, publiku no motorista husu Governu liu husi Ministeriu Transportes no Komunikasaun (MTK) atu buka solusaun alternativa, inklui harii sumafro (lampu merah) ka sistema kontrolu trafiku.
Prezensa polísia trafiku ka instalasaun sinalizasaun moderna sai nuudar urjensia. Nee importante tebes hodi rezolve macet neebe akontese beibeik, no fo konfortu ba sidadaun sira neebe halo viajen iha kapital laran.
Iha sorin seluk, hodi prevene risku iha terenu, autoridade kompetente tenke koloka efetivu liutan pesoal seguransa trafiku nian iha oras importante sira. Nee bele fasilita movimentu transporte publiku no privadu ho diak liutan iha rotunda nia sorin.
Tuir motorista José da Silva, kondisaun iha rotunda nee dala barak halo motorista sira lakon pasiesnia. Sira presiza hein tempu naruk iha oras kolesaun trafiku nian, nunee husu Governu atu tau matan lalais.
“Hau hanoin kolokasaun infraestrutura bazika hanesan lampu merah no reforsu fiskalizasaun trafiku nian nuudar nesesidade importante ida. Ida-nee atu garante sirkulasaun neebe seguru no sustentavel ba futuru iha kapital nee,”dehan José ba STL, iha Dili, Kinta nee (06/08/2026).
Nia hatutan tan katak se Governu labele foti desizaun lalais, macet iha rotunda refere sei kontinua sai asuntu todan. Situasaun nee fo prejuizu ba tempu, no ekonomia motorista sira nian neebe buka moris loron-loron iha Dili laran.
Enkuantu tuir sidadaun lao ain Ana Maria da Silva, laos deit ba motorista, maibe sira neebe halo viajen hodi lao ain mos sente tauk. Sira difisil tebes atu hakur dalan iha rotunda ne’ tanba karreta no motorizada sira halai la iha orden neebe seguru.
“Ami senti atensaun urjente husi parte governu nian mak solusaun uniku. Nee atu salva vida ami sidadaun sira neebe loron-loron tenke hakur dalan perigozu hodi ba servisu no ba eskola,” hatete sudadaun nee.
(car)
