DILI, STLTIMORLESTE.com — Prezindente Movimentu Reafirmasaun Reformasaun Nasional (MORRENA), Cesar Valente, lansa apelu seriu ida ba patriotas no nasionalista hotu iha Timor Leste, liu-liu sira neebe asesu hela ba salariu no regalia boot iha Parlamentu Nasional, Governu, asesor too administradores munisípiu sira, atu loke matan ba realidade moris povu nian hodi halo analiza klean entre kustu de vida atual, aumentu impostu no taxa, no kestaun foti povu nia rai ho dalan neebe la dignu hodi fo ba negosiante estranjeiru sira buka lukru.
Iha kometariu neeebe hatoo ba publiku, Cesar Valente husu atu lideransa no figura publiku sira neebe goza moris diak husi estadu nia orsamentu, atu para no halo analiza klean ida kona-ba kustu de vida atual neebe povu kiík infrenta loroloron.
“Ita presiza sinkroniza fali realidade nee ho polítika impostu no taxa sira neebe Governu hasae daudaun kinta-kantu, tamba ida nee fo todan ba povu nia kabas,” tenik Cesar Valente ba STL, iha Dili, Kinta nee (06/08/2026)
Tuir MORRENA, situasaun sai susar liu tan no preokupante liu bainhira haree ba kestaun rai. Cesar Valente kritika makaas tanba iha pratika balun neebe foti povu nia rai ho dalan neebe la dignu, hodi hamoos ka duni sai sidadaun kiík hosi sira nia rai moris nian.
Pior liu tan, tuir lider MORRENA nee, rai sira neebe foti husi povu lori fali ba fo ba negosiante estranjeiru sira hodi buka lukru rasik, enkuantu povu nain rasik moris iha susar no lakon sira nia hela fatin.
Husi nee, Prezidente MORRENA husu ba hotu-hotu neebe kaer podor no manan moris diak hosi estadu atu hatudu duni sentimentu nasionalizmu neebe loos lais deit ho liafuan, maibe liuhusi defende povu nia direitu, reavalia taxa no impostu neebe todan, no para lalais asaun hodi sakrifika povu nia rai ba interese partikular no negosiante estranjeiru sira.
Iha parte ketak observador polítika, Mariano da Costa, haktuir katak apelu neebe hatoo husi Cesar Valente reflete loloos preokupasaun neebe moris dadaun iha sosiedade nia laran, tanba desizaun sira kona-ba taxa no kestaun rai tenke tau povu nia interese nuudar prioridade prinsipal hodi evita dezigualdade sosial neebe klean liu tan iha rai laran.
“Ita hotu hatene katak povu nia sofrimentu loroloron la bele hein deit ho kolen, tanba nee mak tempu ona ba Governu no lideransa hotu atu rona ho aten brani apelu Prezidente MORRENA nian, no foti medida neebe tuir loloos atu salva moris no futuru sidadaun tomak iha rai laran,” dehan Mariano,
Entretantu akademista hosi UNPAZ, Duarte de Oliveira, haktuir katak kestaun neebe Prezidente MORRENA levanta merese atensaun seriu hosi instituisaun Estadu nian, tanba dezenvolvimentu neebe loos tenke iha korrelasaun direta ho bem-estar povu nian, laos hodi sakrifika sidadaun kiík nia direitu ba rai no moris diak hodi fo benefísiu deit ba grupu balun.
(car)
