DILI, STLTIMORLESTE.com – Tribunal Judisial Primeira Instansia Dili (TJPID) iha loron Kinta nee (06/08/2026) liu husi despaisu ba prosesu primeiru interogatoriu, deside aplika medida tolu ba arguidu nain 7 neebe envolve iha atividade Scamming Call Centre.
Iha despaisu nee, Juiza turnu Maria da Silva Pinto deside aplika medida tolu ba arguidu nain 7, mantein ho medida Termo Indentidade Rezidensia (TIR) neebe antes nee iha ona, medida Proibisaun ba Auzensia no medida kausaun ba arguidu nain hitu kada arguidu ho kausaun USZ$ 3000.
Antes nee iha alegasaun Prokurador João Marques solisita ba iha Tribunal atu aplika medida haat ba iha arguidu nain 7. Medida haat nee mak hanesan Aprezentasaun Periodika, Proibisaun ba Auzensia, Kausaun kada arguidu 3 mil, no kontinua mantein ho medida Termo Indentidade Rezidensia (TIR) neebe antes nee iha ona.
Aleinde defeza arguidu sira nian, Advogadu Privadu Euzebio solisita ba iha Tribunal atu haree uluk lai konaba mandadu detensaun nee. No defeza mos aseita ho kausaun neebe Prokurador husu, maibe husu Tribunal atu aplika kausaun menus husi US$ 3 mil.
Arguidu sira lori mai iha Tribunal Ministeriu Publiku neebe reprezenta husi Prokurador Joao Marques, promove arguidu sira ho krime, Jogu Ilisitu previstu iha artigu 322, Asosiasaun Kriminoza previstu iha artigu 188, Brankamentus Kapitais previstu iha artigu 313, no Burla Informatika previstu iha artigu 268 husi Kodigu Penal Timor Leste nian.
Prosesu nee prezide husi Juiza estajiada Maria da Silva Pinto, Ministeriu Publiku reprezenta husi Prokurador Joao Marques, arguidu sira hetan asistensia legal husi Advogadu Privadu Euzebio.
Rekorda katak, Polisia Nasional Timor-Leste (PNTL) liu husi Diresaun Servisu Investigasaun Kriminal (DSIK) no Diresaun Servisu Informasaun Polísia (DSIP), junta Forsa Polisia (FP), hamutuk ho Servisu Migrasaun (SM), halao operasaun konjunta hodi desmantela atividade rede Scam Call Centre iha apartamentu ida neebe lokaliza iha Suku Fatuhada, Postu Administrativu Dom Aleixo, Munisípiu Dili.
Entretantu iha operasaun nee, ekipa konjunta konsege identifika sidadaun Xinez nain 6 inklui feto ida, neebe deskunfia envolve iha atividade Scam Call Centre refere.
Ekipa konjunta kontinua halo apreensaun ba sasan sira neebe uza atu apoia atividade nee, inklui telemovel hamutuk 30, ekipamentu Starlink hamutuk 2 no iPad hamutuk 3.
(ter)
