DILI, STLTIMORLESTE.com – Centru Formasaun Juridiku no Judisiariu (CFJJ) oras nee daudaun halao hela formasaun ba iha oitavu kursu Majistradu judisial, tanba nee formasaun sira nee ho rigor, se mak hatene ho valor diak mak bele pasa ba iha kareira Juiz, Prokurador no Advogadu Privadu.
Tuir Diretor Centru Formasaun Juridiku no Judisiariu, Fransisco Xavier Vasco Soares katak, formasaun neebe halao iha CFJJ ho rigor, kandidatu neebe hatene maka bele passa.
“Formasaun nee ho rigorozu, se hatene mak bele passa, se la hatene labele passa tanba knaar neebe iha importante tebes, presiza ema ida neebe hatene duni maka bele passa, la eziste familiarizmu tamba formador sira balu mai husi rai liur,” dehan Vasco ba STL iha Kaikoli, Kinta (06/08/2026).
Tuir Vasco, formasaun neebe lao hela iha CFJJ ba iha oitavu kursu nian, kompostu husi formados ba kareita Juiz nain 12, Prokurador nain 11, no Defensor Publiku nain 10, sira nee durasaun ba iha formasaun durante tinan tolu. No iha mos formasaun ketak ba ofisial da justisa husi Defensor Publiku nian hamutuk naim 23.
Dehan nia, konaba formasaun komplementar ba Juiz sira sei prepara hela, tamba nee formasaun komplementar bele akontese iha fulan Setembru.
Esplika tan, tuir numeru neebe iha oras nee dadaun ita iha Juiz menus husi 40, Prokurador mos numeru 30 ba leten, la lembra lolos numeru neebe iha.
Iha fatin ketak, Akademiku UNTL, Rafael de Jesus dehan, teste sira neebe halo tenke ho rigor, atu produs ema ida ho kapasidade neebe diak.
“Hanoin formasaun sira hanesan nee tenke halao selesaun ba teste ikus ho rigor, atu nunee kandidatu ida neebe asumi knar hanesan autor judisiariu, tenke ho kapasidade neebe diak atu labele hamosu prekupasaun iha publiku,” dehan nia.
Nia dehan, kuandu sentru formasaun produs kandidatu sira ho kualidade, mak sistema sektor justisa kontinua sei lao ba oin lori justisa ba oin.
(ter)
