DILI, STLTIMORLESTE.com – Polisa Nasional Timor Leste (PNTL) simu ona despaisu ofisial husi Ministeriu Interior (MI) atu hahu ona preparativa ba realizasaun re-teste ba Kandidatu PNTL foun hamutuk nain 12.996 neebe antes nee tuir ona selesain ba rekrutamentu referensi.
Segundu Komandante Jeral Polisia Nasional Timor Leste (PNTL), Komisariu Assistente Polisia, Natercia Eufrasia Soares Martins hatete, atrazu neebe akontese durante nee tanba seidauk iha despaisu ofisial husi Ministeriu Interior (MI) atu fo forma komisaun responsavel ba prosesu re-teste.
“Problema neebe akontese mak atrazu hodi hetan despaisu husi Ministeriu Interior, depois despaisu nee mai ami bele forma estrutura ka komisaun atu halao servisu, ita haree despaisu nee tun ona iha semana kotuk no ekipa komisaun mos forma ona,” hatete Segundu Komandante Jeral Polisia Nasional Timor Leste (PNTL), Komisariu Assistente Polisia, Natercia Eufrasia Soares Martins ba jornalista sira iha nia knaar fatin KomJer, Kinta (06/08/2026).
Nia tenik, daudaun nee sira iha hela dezenvolve etapa sira atu perepara prosesu re-teste.
Nia esplika, despaixu refere fo autorizasaun ba PNTL atu organiza no halao fila-fali prosesu avaliasaun no transparensia no profisionalizmu, tuir orientasaun governu no lejislasaun neebe vigora.
Nia informa, informasaun katak PNTL komisaun organizador sei perepara etapa hotu-hotu ba re-teste, inklui verifikasaun dokumentus, ezame saude, teste aptidaun fizika, teste eskrita no entervista iha tempu badak liu husi kenal ofosial PNTL.
Komisaria Assistente Polisia nee mos hus ba kandidatu sira hotu perepara aan didiak no akompanha deit formasaun ofisial PNTL nian.
Nia informa, komisaun organizador ba re-teste nee kompostu husu reprezentante PNTL, Komisaun Funsaun Publiku (KFP), Parseiru Australia Federal Polisia (AFP), Police Development Program (AFP), Police Nasional Republikan (GNR) Portugal, neebe selesaun ba kandidatu foun Lao ho transparensia,kredibilidade no tuir prinsipiu meritokrasi.
“Liu husi re-teste ida nee ita sei garante prosesu rekruramentu neebe justu, kredivel no meritu bazeadu, hodi produs rekurusu umanu polisial neebe iha kapasidade atu servisu diak ba povu ho integridade no profisionalizmu,” nia deklara.
Iha fatin seluk, Kandidatu PNTL foun, Sonio Banca dos Santos Silva esplika, Polisa Nasional Timor Leste (PNTL) simu ona despaisu ofisial husi Ministeriu Interior (MI) atu hahu ona preparativa ba realizasaun re-teste ba Kandidatu PNTL foun hamutuk nain 12.996, maibe tenke ho onestu no labele iha tan familiarizmu, tanba teste foin daudaun nee Governu koloka orsamentu neebe boot ba rekrutamentu nee rasik .
“Ami prontu kontinua tuir re-teste fila-fali, maibe ita husu ba PNTL ho MI labele halo fali manipulasaun, tanba ami kandidatu foin daudaun nee mos esforsu makaas hodi liu, espera katak labele iha tan sistema familia,” nia afirma.
(jen)
