DILI, STLTIMORLESTE.com – Ministeriu Publiku (MP) iha loron Kinta (06/08/2026) liu husi alegasaun final solisita ba iha Tribunal atu aplika prizaun preventiva ba sidadaun Indianu nain 3.
Iha alegasaun nee MP konsidera katak, arguidu nain tolu hanesan sidadaun estanjeru, no bele akontese perigu de fuga, tanba nee husu Tribunal atu aplika prizaun preventiva ba arguidu nain 3 ho inisial, SS, BS no RS.
Enkuantu defeza husi arguidu nain 3 nian husu ba Tribunal atu aplika medida Aprezentasaun Periodika no Termo Indentidade Rezidensia (TIR) ba arguidu sira.
Depois rona tiha alegasaun, Tribunal adia ba loron aban hodi rona desizaun.
Arguidu sira submete mai Tribunal, tanba deskonfia envolve iha kazu Trafiku Umanu.
Prosesu primeiru interogatoriu nee prezide husi Juiz turnu Ivan Patrocenio, Ministeriu Publiku reprezenta husi Prokurador Domingos Gouveia, arguidu nain tolu hetan asistensia legal husi Advogadu Privadu no Defensor Publiku.
Rekorda katak, iha loron 3 fulan nee, Polísia Nasionál Timor Leste (PNTL) liu husi Diresaun Servisu Investigasaun Kriminal (DSIK), ezekuta mandadu detensaun neebe Tribunal Judisiál Primeira Instánsia Díli (TJPID) hasai ho NUK: 0215/26.PNSIC hodi detein sidadaun estranjeiru nasionalidade India nain 3 neebe suspeita envolve iha kazu trafiku umanu.
(jos)
