DILI, STLTIMORLESTE.com – Polisia Nasional Timor Leste (PNTL) liu husi ekipa sekreta kompostu husi Makikit Dili, junta Kakuk husi SNIE, asegura joven nain 3 ho inisial MCS, AS no CAL deskonfia involve iha kazu naok motor iha estrada publika.
Tuir informasaun neebe iha, ekipa servisu simu informasaun husi fontes akreditadu kona-ba joven nain 3 neebe envolve kazu naok motorizada nee iha loron 27 Julhu 2026.
Tan nee PNTL halo kedas intervensaun durante semana rua no ikus mai konsege identifika no asegura joven nain 3 nee iha area Fatu-Ahi, Suku Aidak Bihare, Postu Administrativu Dom Aleixo, Munisipiu Dili.
“Hafoin asegura, suspeitu sira lori kedas ba Eskudara PNTL Nain Feto Balide hodi kontinua halo prosesu investigasaun klean, inklui rekolha informasaun no evidénsia sira neebe relasiona ho kazu rouba motorizada refere,” haktuir nota komunikadu imprensa neebe STL asesu husi Servisu Relasaun Publika, Domingu (09/08/2026).
Servisu Investigasaun Kriminal sei determina liu tan faktu no responsabilidade husi kada suspeitu tuir rezultadu investigasaun hafoin kazu nee sei kontinua tuir prosedimentu legal no prosesu investigasaun remata, sei haruka ba Ministeriu Publiku atu halo analize no prosesa tuir lei.
“Se iha baze legal sufisiente, suspeitu sira sei aprezenta ba tribunal kompetente atu responde ba akuzasaun neebe kontra sira, tuir prosedimentu justisa neebe vigora iha Timor Leste,” haktuir komunikadu.
Enkuantu PNTL nafatin iha komitmentu atu kombate krime, liu-liu kazu roubo no furto motorizada, neebe bele hamosu inseguransa iha komunidade leet.
PNTL mos nafatin apela ba komunidade atu aumenta atensaun no kuidadu wainhira hetan ka hasoru asaun krime karik, lalais hatoo informasaun ba autoridade seguransa neebe besik ou liga lalais mai Delta Base liu husi numeru emerjensia 3310080.
PNTL sei kontinua halo operasaun no investigasaun atu garante seguransa, orden no tranquilidade publika iha territoriu Timor Leste.
(alb)
