AMBENO, STLTIMORLESTE.com – Komando Polisia Nasional Timor Leste (PNTL) iha Rejiaun Administrativa Espesial Oecusse-Ambeno (RAEOA) halao inspesaun internal ba kareta no motor neebe utiliza husi membru PNTL loron-loron halo servisu iha Oecusse, konsege hetan infrasaun motorizada 7 no aplika multa, selu infrasaun.
“Ohin ami halo inspesaun internal ba transporte hanesan kareta no motor sira neebe membru PNTL sira uza kada loron mai servisu iha Komando PNTL-RAEOA, ami konsege detekta infrator ba membru PNTL nain 7 neebe membru PNTL sira uza transporte nee loron-loron mai servisu, ida nee sira nia motor privadu maibe dokumentus balun data renovasaun mak liu ona prazu, entaun ohin sira selu kedan,” dehan Komandante PNTL-RAEOA, Superintendente Xefe Polisia, Nicolao Francelino da Costa ba STL iha Komandu PNTL Oecusse, Segunda (10/08/2026).
Nia haktuir tan katak, ba oin PNTL mak tenke hatudu imajen neebe diak ba publiku, atu nunee publiku banati no halo tuir saida mak Polisia halao iha Komando PNTL-RAEOA, defaktu PNTL hadia uluk uma laran mak ba liur, tanba PNTL kuandu halao ninia servisu iha terenu, primeiru estar nia tenke firme uluk, tenke loos uluk antes nia halo aplikasaun ba komunidade sira.
“Sei PNTL loos ona, signifika ita nia komunidade sira hotu tenke halo tuir deit ona tanba Polisia mak sai aparelhu Estadu, sai hanesan seguransa ba povu no rai ida nee atravesa husi serbisu tranzitu rodaviariu nian,” dehan nia.
Iha fatin ketak, Xefe Suku Costa, Francisco Colo dehan, ema hotu-hotu neebe moris iha nasaun nee, tenke kumpri lei no ordem, la haree ba koor ou fardamentu neebe sira uza, tanba nee sidadaun hotu-hotu tantu nia nee komandante ou Diretor ka kagru saida deit maka nia assume, hotu-hotu tenke kumpri lei tranzitu nian.
“Hau nia prespektiva konaba infratores neebe komete husi sidadaun sira neebe viola lei tranzitu, tenke kumpri lei no ordem nuudar sidadaun ida, la haree husi nia assume kargu Diretor ou Komandante ou saida deit, tenke kumpri lei no ordem neebe estadu ida nee regulariza ona.
Nia dehan, PNTL halao ona inspeksaun ba kareta ho motor neebe membru PNTLutiliza ba loron halo serbisu, espera ema hotu-hotu tenke kumpri ordem nee.
Tuir Marcos Elu nuudar komunidade Aldeia Sanane, Suku Costa, Postu Administrativu Pantemakassar RAEOA dehan, durante nee membru PNTL-RAEOA halao serbisu diak ona, neebe sira tenke firme nafatin iha terenu atu tulun povu iha area seguransa no tranzitu rodaviariu hodi nunee hamenus numeru asidente trafiku.
“Ami apresia tebes ho Komando PNTL-RAEOA neebe ohin halo ona inspeksaun interna ba sira nia instituisaun molok sira halo inspeksaun ba iha komunidade, nee hatudu katak, sira tenke loos lai maka foin halo loos ema selu, ami kontente tanba hadia uluk sira nia uma laran,” dehan nia.
(jos)
