DILI, STLTIMORLESTE.com – Tribunal Judisial Primeira Instansia Dili (TJPID) iha loron Tersa (11/08/2026) liu husi despaisu ikus ba prosesu primeiru interogatoriu, deside aplika medida Prizaun Preventiva ba arguidu nain ida hanesan sidadaun Xina.
Arguidu antes nee envolve iha kazu atividade Scamming Call Centre, tanba nee liu husi despaisu Tribunal nian aplika ba iha arguidu medida kausaun ho osan rihun rua atus lima no medida Termo Indentidade Rezidensia (TIR).
Maibe arguidu tenta halai sai husi teritoriu Timor liu husi Aeroportu no ikus mai hetan kapturasaun husi Polisia Sentifika Investigasaun Kriminal (PSIK) iha loron Sabadu nee.
Depois arguidu kompleta tiha 72 horas, submete ba prosesu primeiru interogatoriu iha Tribunal. Iha Tribunal Juiza turnu Ana Paula Fonseca rona tiha arguidu nia deklarasaun, no deside tama ba iha faze alegasaun husi parte Ministeriu Publiku no Defeza arguidu nian.
Iha alegasaun Prokurador João Marques husu Tribunal atu aplika medida Prizaun Preventiva ba iha arguidu. Maibe husi parte defeza nian, Advogadu Privadu Napoleão husu Tribunal atu mantein ho medida kausaun anterior, no aumenta tan osan ba kausaun neebe iha ona.
Rona tiha alegasaun husi parte rua, ikus mai Juiza turnu Ana Paula Fonseca, deside aplika medida Prizaun Preventiva ba iha arguidu, atu asegura prosesu investigasaun neebe sei lao hela.
Rekorda katak, arguidu Polisia Sientifika Investigasaun Kriminal kaptura iha loron Sabadu, iha Aeroportu Internasional Prezidente Nicolao Lobato, Dili, bainhira tenta halai fila ba iha nia nasaun orijen.
Prosesu primeiru interogatoriu nee prezide husi Juiza turnu Ana Paula Fonseca, Ministeriu Publiku reprezenta husi Prokurador João Marques, arguidu hetan asistensia legal husi Advogadu Privadu.
(ter)
