BAUCAU, STLTIMORLESTE.com – Tinan nee iha loron 20 Agostu sei selebra loron FALINTIL ba dala 51, oportunidade ba Komadante FALINTIL Cornelio Gama L7″ husu Parlamentu Nasional (PN) diskute, hodi kura fisur sira neebe sei subar iha funu nain sira nia isin lolon.
Atual Prezidente Konselhu Munisipal Kombatentes Libertasaun Nasional Baucau, Cornelio Gama “L7” hateten, loron FALINTIL iha loron 20 tinan 2026 nee sei selebra ba dala 51 luta nain no sidadaun sira hotu tenke mantein pozisaun hodi koalia kona-ba prinsipiu FALINTIL nian ba futuru, tanba hateke ba pasadu iha buat balu neebe sei naksalak. Naksalak sira mak hanesan, koalia kona-ba entre funu remata FALINTIL maioria abandona. Hanesan Komadante Ologari no membru sira husi Komadante seluk neebe hetan dezarmamentu iha Aileu, too ohin loron balu sei abandona.
“Hau husu ita buka meius oinsa rezolve problema nee, labele abandona, abandona nee mak hanesan fisur ida karik aban bainrua tasak bele nakfera, tanba nee ema. Entaun hau husu mak nee, primeiru rezolve problema Ologari nian ho rejiaun tres dezarmamentu Aileu nian,” hateten Cornelio Gama “L7” ba STL iha nia knaar fatin Vila Antiga Baucau, Tersa (11/08/2026).
Tuir L7, asaun abandona Komandante FALINTIL no membru balu mak nuudar fisur ida neebe sei subar no helik iha kotuk, nunee selebrasaun loron FALINTIL ba dala 51 nuudar oportunidade ba Parlamentu Nasional (PN) atu diskute buka solusaun hamutuk, tanba entre sira neebe sei abandona mos ema umanu neebe iha fuan no hanoin, mak bainhira la rezolve problema neebe sira enfrenta atual, sai hanesan fisur sei nakfera iha loron ruma. Nunee, aproveita oportunidade nee buka solusaun hamutuk rezolve problema sira neebe iha hodi labele implika no mosu asaun seluk iha futuru.
Tanba tuir planu bainhira funu remata, hahu husi rejiaun ida too haat submete relatoriu funu nian husi tinan 1975 too 1999 no kada rejiaun hatama mos armas funu nian inklui servisu Frente Klandestina nian.
“Agora ita lakoalia kona-ba ida nee, nee mak problemas boot. Problemas boot mak saida liu liu Ologari nian no dezarmamentu Aileu. Pudia funu hotu tiha mak rejiaun um dois tres quatro tun hotu aprezenta ba povu ida nee, agora dezarma deit duni deit nee oinsa,” L7 hatutan.
Maibe Komadante FALINTIL nee komenta, problema sira nee laos ona kestaun atu rai iha fuan, maibe tenke rezolve, tanba iha tempu ukun aan laiha ona kroat hodi hatudu ba malu, maibe buka dalan hamutuk hodi rezolve problema sira neebe sei iha kotuk.
Tanba tempu ona rezolve problema sira neebe sei iha kotuk antes nasaun nee entrega ba jerasaun foun sira lidera ho kontente no unidade.
Aliende mos nia husu Veteranus sira atu utiliza uniformenidade veteranus nian iha selebrasaun loron FALINTIL ba dala 51, nuudar momentu importante ba jerasaun foun sira atu koinhese luta nain sira.
“Iha selebrasaun 51 anos, veteranus sira neebe simu ona farda iha selebrasaun, para ita nia oan jerasaun foun sira haree dehan ida nee mak funu nain, laos simu tiha rai deit,” nia hakotu.
(tom)
