DILI, STLTIMORLESTE.com – Violensia Domestika sai ona hanesan krime publiku, tanba nee se deit mak haree akontese krime nee, bele hatoo kedan keixa.
“Hau hanoin ida nee hanesan krime publiku, se deit mak haree akontese krime nee bele hatoo keixa, tanba lei iha atu regula aktu nee, la presiza hein vitima rasik mak ba hatoo keixa,” dehan Jurista Jose Maria Gutrres ba STL iha Dili, (Tersa 11/08/2026).
Nia dehan, kazu Violensia Domestika ohin loron nia numeru aas, hatudu katak komunidade sira iha ona konhesimentu konaba lei Violensia Domestika, tanba nee bainhira hasoru Violensia Domestika sira hatoo kedan keixa.
Nia sublina, atu halo redusaun krime nee iha futuru, presiza halo sosializasaun ba lei Violensia Domestika, atu nunee ema iha ona konhesimentu konaba lei Violensia Domestika halo sira tauk atu pratika aktu nee.
Informa tan, inan sira neebe hasoru Violensia Domestika labele tauk atu koalia sai no hatoo keixa, tanba hato’o keixa hanesan dalan ida atu halo prevensaun iha futuru.
Iha sorin seluk, Akademiku UNTL, Rafael de Jesus dehan, presiza halo prevensaun ba Violensia Domestika, atu nunee inan sira labele sai beibeik vitima ba krime nee.
“Presiza halo prevensaun, maibe desizaun Tribunal tenke todan, se autor judisiariu sira foti desizaun todan ba aktu Violensia Domestika mak halo ema tauk atu pratika aktu nee,” dehan nia.
Afirma tan, autor judisiariu tenke tetu atu aplika kastigu todan ba autor sira, se autor ida hetan ona kondenasaun todan mak sai ona hanesan ezemplu ida, atu ema seluk labele kontinua pratika aktu nee.
Nia hatutan, tau konfiansa ba iha Tribunal, fiar katak desizaun neebe Tribunal foti hanesan meius ida hodi halo prevensaun iha futuru.
Antes nee, desizaun neebe Tribunal aplika ba iha krime Violensia Domestika mak hanesan pena suspensaun no pena multa.
(ter)
