DILI, STLTIMORLESTE.com – Liu husi Komunikadu Media Ministeriu Interior neebe STL asesu katak, Ekipa Servisu Operasaun husi Servisu Migrasaun halao atividade operasaun rutina no konsege asegura sidadaun estranjeiru nain lima (5) iha area Hudi Laran.
Entretantu bazeia ba planu operasional neebe iha, ekipa Makikit ho ekipa operasaun Servisu Migrasaun tama sai otelaria no fatin karaoke iha Kapital Dili laran, hodi halo fiskalizasaun no inspesaun ba sidadaun estranjeru sira no konsege asegura sidadaun estrajeiru feto nain lima (5) ho naran inisial LRA, ISA, PO, DH no ARP iha fatin karaoke sira iha Dili laran, tanba uza vistu turista hodi halo atividade komersial.
Iha operasaun nee Ekipa Servisu Migrasaun haree liu ba pasaporte no violasaun vistu tanba tuir Sistema Jestaun Fronteira nian detekta katak sidadaun hirak nee vistu mate ona, nunee ekipa servisu halo planu operasaun hodi buka tuir too hetan iha area Dili Oeste nian.
Depois prosesu identifikasaun, investigador Servisu Migrasaun nian notifika katak maioria sidadaun estranjeiru sira nee uza vistu turista hodi buka fali servisu hetan lukru nunee sira konsidera halo violasaun ba Lei Migrasaun no Azilu, iha artigu 143 no aplika sansaun selu multa, maibe sira neebe rekuza sei submete lista naran ba iha Ministeriu Publiku atu prosesa tuir lei.
(jen)
