DILI, STLTIMORLESTE.com – Prezidente Republika (PR), Jose Ramos liu husi sosiedade sivil Prezidensia Republika apoiu sasan ba Parokia Dare hodi selebra loron Saun Tarsisiu.
Prezidensia Republika liu husi Servisu Sosiedade Sivil no Assuntu Sosial (SSSAS) entrega ona apoiu nesesidade bazika ba Komisaun Organizadora Parokia Dare nian hodi komemora Loron Saun Tarsísiu.
Liu husi komunikadu neebe STL asesu husi media Prezidensia Republika, Kuarta (12/08/2026) hatete, apoiu nee mai husi inisiativa Prezidente Republika, Jose Ramos Horta atu tulun komunidade parokial sira iha preparasaun ba selebrasaun relijioza importante nee.
Atu ajuda fasilita preparasaun loxístika no akomoda partisipante sira durante selebrasaun nee, ekipa SSSAS fornese ona pakote ai-han baziku.
Sasan sira neebe entrega mak hanesan fos saka 25, Supermie Mie Sedaap kaixa 10, mina-tein Bimoli kaixa 5, manu-tolun kaixa 2, no ikan-lata deho kaixa 2.
Entrega apoiu ida nee reflete kompromisu kontínuu Prezidente Ramos-Horta nian atu fo tulun ba atividade relijioza no komunitaria sira iha Timor Leste tomak. Liu husi SSAS, Prezidensia Republika kontinua promove solidariedade, enkoraja partisipasaun foinsae sira nian iha moris espiritual no síviku, no fo apoiu pratiku ba parokia sira iha baze.
Prezidente Republika Jose Ramos Horta hatete, durante nia mandatu buka apoiu komunidade neebe mak vuneravel neebe presiza tulun, nomos povu aileba nomos ba igreza neebe mak presiza tulun.
Prezidente hatete, bainhira hetan imformasaun ruma husi autoridade lokal, igreza neebe presiza tulun Prezidente Republika iha tempu ba direita haree fo apoiu maibe karik tanba serbisu seluk liga ho estadu nia sei delega ekipa prezidensial Republika tun hodi halo verifikasaun no fo apoiu.
(eme)
