BAUCAU, STLTIMORLESTE.com – Prezidente Konselhu Munisipal Kombatentes Libertasaun Nasional (CMCLN) Baucau, Cornelio Gama “L7” hateten, veteranus balu baruk haree deputadu sira iha Parlamentu Nasional (PN), tanba maioria buka insulta malu deit.
Deklarasaun nee Prezidente CMCLN Baucau, Cornelio Gama “L7” hateten ba jornalista STL iha nia knaar fatin Vila Antiga Baucau, Kuarta (12/08/2026)
“Iha Parlamentu, kada deputadu ida-idak tenke haree nia komisaun, tanba ami sempre akompanha deputadu sira iha Parlamentu. Laos koalia kona-ba povu nia moris, maibe koalia soke malu,” katak L7.
Tuir Komandante FALINTIL nee, deputadu sira mak reprezentante povu iha uma fukun Parlamentu Nasional, neebe iha responsabilidade atu koalia kona-ba progresu dezenvolvimentu no aprezenta preokupasaun povu nian, hanesan saude, edukasaun, estrada, bee moos no nesesidade sira seluk ba ministeriu ida-idak.
Komandante FALINTIL nee fo hanoin ba deputadu sira katak, Timor Leste ukun aan tinan 24 ona maibe povu sei terus no halerik, tanba falta infraestrutura bazika.
Nunee, nia husu deputadu sira atu halao sira nia responsabilidade hodi haree no rona preokupasaun povu nian, depois aprezenta no buka resposta ba problema sira durante mandatu tinan lima, laos atu soke malu iha Parlamentu Nasional.
“Ami veteranu haree ida ne’e baruk fali. Se partidu ida mai hamutuk aumenta programa, laos mai kritika malu tun sae. Ami veteranu rona ida nee ami baruk fali,” dehan L7.
(tom)
