BAUCAU, STLTIMORLESTE.com – Sekretariadu Tekniku Administrasaun Eleitoral (STAE) Munisipiu Baucau seidauk koloka nia funsionariu iha nivel Postu Administrativu, hodi fo atendimentu kartaun eleitoral biometriku ba eleitores sira, tanba seidauk hetan formasaun espesifiku husi nasional.
Diretor STAE Baucau, Natividade Freitas Guterres aprezenta, mezmu Komisaun Nasional Eleisaun (CNE-sigla português) Baucau fasilita ona formasaun ba nia funsionariu sira no koloka ona iha nivel Postu Administrativu sira iha area juridiku Munisipiu Baucau atu fo asistensia ba servisu STAE nian iha nivel Postu Administrativu relasiona atendimentu kartaun eleitoral biometriku ba eleitores sira.
Maibe parte STAE Baucau seidauk koloka funsionariu rekrutadu nain 24, kompostu pontu fokal, operador no assistente, tanba seidauk hetan formasaun espesifiku atu aranka ba Postu hodi atende eleitores sira.
“Oras nee daudaun ita nia funsionariu sira nee sei destaka iha Baucau iha dia 19 no 20 agora sira sei tuir formasaun. Depois de formasaun mak ita sei haruka sira ba kada Postu atu fo atendimentu ba ita nia eleitores sira,” hateten Diretor STAE Baucau, Natividade Freitas Guterres ba jornalista sira iha nia knaar fatin Vila Nova Baucau, Kinta (13/08/2026).
Nia informa, husi funsionariu nain 24 sei koloka ba kada Postu Administrativu ema nain tolu kompostu pontu fokal ida, operador ida no assistente ida, iha neebe loron 19 too 20 fulan Agostu 2026 parte Nasional sei fasilita formasaun espesifiku kona-ba, aberta I.D operador nian, nunee fo atendimentu diak ba eleitores sira iha baze.
Nia sublina, bainhira remata formasaun no kolokasaun funsionariu rekrutadu ba nivel Postu fo atendimentu ba eleitores sira, sei remata iha faze inisiu preparsaun ba festa demokrasia tinan 2027, hodi eleitores sira partisipa iha eleisaun Prezidensial.
“Ita nia planu kada loron ita atende ema nain 50 eleitores sira nee bele troka hotu ona kartaun, maibe ita nia material tarde entaun bele mos la atinji, maibe ba eleitores sira la presiza paniku, tanba eleisaun neebe mai iha posibilidade uza kartaun eleitoral semi biometriku no biometriku,” Natividade fundamenta.
Diretor STAE Baucau nee akresenta, politika kolokasaun funsionariu rekrutadu ba nivel Postu Administrativu hodi fo atendimentu kartaun eleitoral biometriku ba eleitores sira, ho objetivu atu lori besik atendimentu publiku besik ba eleitores sira iha nivel Postu, neebe susar atu trata sira nia eleitoral iha nivel Munisipiu.
Nia komenta, bainhira koloka ona funsionariu rekrutadu iha nivel Postu Administrativu, posibilidade sei halao atendimentu too iha Suku hodi fasilita liu tan eleitores idozu, idoza no Ema ho Difisiensia sira.
“Kondisaun rede internet sira nee ita halo ona teste ba material sira too iha Postu, ita sei utiliza rede tolu neebe eziste, maibe ba Suku ita utiliza rede internet husi Starlink neebe instala ona iha Suku hodi atendimentu ba ita nia eleitores sira,” Natividade katak.
Diretor nee argumentu, prezensa STAE nian iha nivel Postu no Suku mak dalan lori besik atendimentu kartaun eleitoral biometriku ba eleitores sira, tanba nee husu eleitores sira prepara dokumentus hanesan sertidaun nasimentu no bilhete indentidade, nunee bainhira ekipa STAE prezensa ona iha nivel Postu no Suku bele troka kartaun eleitoral semi biometriku ba biometriku inkliu halo rejistu foun.
Iha sorin seluk, eleitores Augostu António Ximenes agradese ba politika STAE nian neebe atu instala ekipamentus STAE nian iha nivel Postu Administrativu hodi fo atendimentu ba eleitores tuan no foun sira, tanba politika nee mak dalan atendimentu besik ba Povu iha remotas.
“Ba hau pesoal agradese ba hanoin nee, tanba nee ami nia inan aman sira neebe idade ona bele troka deit ona sira nia kartaun eleitoral iha ami nia Postu, maibe sira STAE labele koalia deit, tanba ami akompanha notisia buat nee sira koalia tiha ona iha fulan hirak liu ba, maibe too agora seidauk ba Postu, tanba nee ami husu labele koalia deit, maibe tenke realiza,” Eleitores Augostu komenta.
(tom)
