DILI, STLTIMORLESTE.com – Bainhira tasi maran neebe mosu iha area kapital Dili loke fali oportunidade ba komunidade sira hodi halai ba tasi ibun buka ikan no mos fahe tempu hodi buka animal tasi iha fatuk leet ka leten.
Observasaun iha terrenu hatudu katak, bainhira tasi surut no maran, fatin nee sai fatin ba ema sira neebe badinas buka ikan loron-loron nian hodi sustenta ekonomia uma laran. Ho uza deit liman no matan kroat, sidadaun barak haree lao ain fatin iha area tasi klaran neebe nakonu ho fatuk karakol no rai henek. Sira badinas buka no kaer buat ruma neebe bele lori ba uma hodi faan ka uza nuudar ai han familiar.
Atividade nee hatudu realidade moris nian, neebe fenomenu tasi maran laos deit mudansa natural, maibe nuudar aspetu kritiku ba ekonomia kiik komunidade nian. Maski ho ekipamentu neebe simples no limitadu, esforsu husi ema sira nee lao nafatin hodi buka ikan iha tempu neebe tasi maran.
Jose da Silva, hanesan sidadaun, hatete katak tempu tasi maran hanesan nee bele ajuda tebes komunidade kiik sira atu hetan rendimentu.
“Ami mai iha nee hodi buka ikan loron-loron nian, tanba tempu tasi maran hanesan nee mak foin fo oportunidade ba ami atu hetan ikan ka animal tasi ruma hodi bele sustenta fali ami nia família,” nia dehan ba STL, iha tasi ibun, Díli, Kinta Loraik, (13/08/2026).
José hatutan tan katak, maski servisu nee susar no presiza paciência boot iha tempu neebe manas, maibe dedikasaun nee sai dalan uniku neebe disponível hodi hamenus todan moris nian iha tempu susar.
Entretantu Mariano, hanesan negosiante neebe faan iha aea tasi ibun nee, hatete katak bainhira tasi maran no ema halai ba tasi ibun, nia mos hetan benefisiu tanba kliente barak liu mak mai sosa ai han no bee hemu. “Tempu tasi maran hanesan nee mos ajuda ami nia negosiu kiik bele hetan lusuk oituan, tanba ema barak mak halibur iha nee hodi buka ikan,” nia haktuir.
Mariano hatutan tan katak, komersiu kiik hanesan nee mak lori hela esperansa ba moris loron-loron nian, tanba kada Loron tasi maran fo mos vantajen ba negosiante kiik sira neebe depende ba movimentu komunidade nian iha tasi ibun.
(car)
