DILI, STLTIMORLESTE.com – Misaun Parseria Pasífika 2026 neebe lidera husi Naval Estadus Unidus Amérika (EUA) fila-fali mai Dili, iha loron 13 too 26 Agostu, hodi marka misaun nee nia vizita ba dala 8 mai TL.
Liu husi komunikadu imprensa neebe STL simu husi media EUA Sesta nee (14/08/2016), hatete, misaun tinan ida-nee halibur membru militar sira husi TL, Kanadá, Alemaña, Nova Zelándia, no Estadus Unidus Amérika hodi hametin interoperabilidade rejional, hasae kapasidades preparasaun hasoru dezastre, no aprofunda parseria sira iha Indo-Pasífiku laran tomak.
Ida-nee mos destaka TL nia adezaun foin lalais iha Outubru 2025 nuudar membru foun liu husi Asosiasaun Nasaun Sudeste Aziátiku (ASEAN).
Iha Timor-Leste, pesoal sira Parseria Pasífika nian sei serbisu hamutuk ho Forsa Defeza Timor-Leste (F-FDTL), espesialistas Timoroan sira, no organizasaun laos lukrativu sira hodi troka koñesimentu, hasae komprensaun mutua, no hametin reziliensia no kapasidade neebe fahe ba malu hodi responde ba dezastre sira.
Embaixada E.U.A. nia Enkarregadu Negósius, Bruce Begnell hatete, Parseria Pasífika reflete Amérika nia kompromisu tempu naruk ba TL no Timoroan sira.
“Tinan ida-nee, ami sente orgullu serbisu hamutuk ho ministérius oioin iha Governu TL hodi eleva servisu mediku profisionál no hametin kapasidade jestaun dezastre. Ami sente onradu halo parseria ho omólogu Timoroan sira iha governu laran, setór privadu, no sosiedade sivíl hodi avansa governu nia prioridade prinsipál sira. Hamutuk, ita hametin TL nia kapasidade atu fó resposta ba dezastres, fornese servisu esensiál sira, no hadiak kualidade moris ba komunidade sira iha nasaun ne’e. Misaun ida-nee hatudu katak ami-nia parseria neebe lao daudaun ho TL harii atu metin ba tempu naruk,” dehan nia liu husi komunikadu nee.
Serimónia abertura iha loron 13 Agostu iha Dili hatudu atuasaun kultural, jogu amizade futeból, no diskurss hatoo husi Xefe Estadu Maiór Jenerál F-FDTL Tenente Jenerál Falur Rate Laek no Kontra-Almirante Navál E.U.A. Taylor, Komandante Grupu Lojístika Pasífiku Osidentál no Forsa Tarefa 73.
Kontra-Almirante Navál E.U.A. Taylor hatete, Parseria Pasífika hatudu saida maka nasaun sira bele realiza bainhira investe ba iha relasaun sira molok dezastres akontese.
“Ami-nia retornu mai TL ba edisaun dala 8 nee reflete amizade liu dékada rua hari’i bazeia ba respeitu malu no fahe esperiénsias. Kada interkámbiu durante misaun nia parajen fó oportunidade atu aprende ba malu, hametin ita-nia prontidaun koletiva, no harii konfiansa neebe presiza atu responde hamutuk bainhira ita-nia nasaun sira presiza tebes ita,” dehan nia.
E.U.A. nia Navál Seabees, husi Naval Mobile Construction Battalion Five no Amphibious Construction Battalion One, sei serbisu hamutuk ho badaen Timoroan sira hodi konstrui edifisiu eskola foun ho sala rua iha eskola primária Ensinu Baziku Filial (EBF) Mota Ulun, hamutuk ho renovasaun ba sala-de-aula no hadia instalasaun sira iha EBF nee. Profisionál médiku sira sei halao troka koñesimentu iha optometria, odontologia, no reabilitasaun. Espesialista sira jestaun dezastre nian sei lidera avaliasaun armajen loron barak nian, ezersísiu simulasaun nian, no eventu rua husi Autoridade Protesaun Sivíl nian. Banda Pacific Partnership mos sei halao atuasaun iha Universidade da Paz (UNPAZ), Timor Plaza Night Market, no eskola lokál sira.
Liu husi kolaborasaun ho omologu lokal sira, Parseria Pasífika hari’i kapasidade ba tempu naruk, reziliénsia, no preparasaun hasoru dezastre dura liután maske misaun nee halo-hotu ona.
“Ami sente onradu simu husi povu TL atu ita kontinua Parseria Pasífika 2026,” dehan Navál E.U.A. Tenente Al-Qumar Atkins, ofisiál neebe responsavel ba misaun nee iha TL.
Nia dehan, iha liña esforsus hotu-hotu serbisu la hatene kole hodi prepara ba misaun ida nee.
“Ami haksolok atu serbisu hamutuk ho ami-nia parseiru Timoroan sira hodi hametin relasaun hirak-ne’ebé halo ita-nia nasaun sira sai reziliente liután. Iha ninia sentru, Parseria Pasífika nee kona-ba ema – harii konfiansa, fahe koñesimentu, no haburas parseria duradoura hodi ajuda ita-nia komunidade sira prepara hamutuk ba dezafius iha futuru,” dehan nia.
Hari’i hafoin militár E.U.A. nia resposta ba tsunami iha Oseanu Índiku iha 2004, Parseria Pasífika sai hanesan misaun asisténsia umanitária multinasionál no preparasaun hasoru dezastre halo tinan-tinan neebw boot liu husi Mariña E.U.A. iha Indo-Pasífiku, foku ba kooperasaun médiku, enjeñaria, jestaun ba dezastre, no divulgasaun ba komunidade.
Frota da-7 Estadus Unidus Amérika nian, frota númeru boot liu husi Mariña, halo interasaun no opera ho aliadu no parseiru sira hodi prezerva Indo-Pasífiku ida neebe livre no nakloke. Frota Pasífiku E.U.A. nian fornese forsa navál sira neebe prontu ba kombate hodi defende nasaun no E.U.A. nia intereses, fornese disuasaun kredível, no hametin aliansa no E.U.A. nia parseria sira hodi asegura rejiaun ida neebe seguru no prósperu.
(dom)
