DILI, STLTIMORLESTE.com – Tribunal Judisial Primeira Instansia Dili (TJPID) iha loron Sesta (14/08/2026) halao prosesu primeiru interogatoriu ba arguidu nain 5.
Arguidu nain 5, autoridade seguransa desmantela iha loron 11 fulan Agostu iha area Santa Cruz no mos Bebonuk.
Arguidu sira submete mai iha Tribunal, Prokurador promove arguidu nain 8 ho krime Jogu Ilisitu previstu iha artigu 322 husi kodigu penal, Krime Asosiasaun Kriminoza previstu iha artigu 188 husi Kodigu Penal, Krime Brankamentus Kapitais previstu iha artigu 313 husi Kodigu Penal, no krime Burla Informatika previstu iha artigu 268 husi Kodigu Penal Timor Leste nian.
Juiz turnu Rozito Guterres rona tiha arguidu sira nia deklarasaun, deside tama ba alegasaun husi parte Ministeriu Publiku no defeza.
Iha alegasaun, Prokurador solisita ba iha Tribunal atu aplika ba arguidu nain 5 medida Prizaun Preventiva.
MP mos deklara katak, se Tribunal entende oin seluk, husu Tribunal atu aplika medida kausaun kada arguidu ho osan rihun US$ 5, medida Proibisaun ba Auzensia, no medida Aprezentasaun Periodika semana ida dala rua iha Tribunal.
Enkuantu husi parte defeza nian husu Tribunal atu aplika kausaun kada arguidu ho rihun US$ 250.
Rona tiha alegasaun, Tribunal adia ba iha loron Sabadu hodi rona despaisu ikus husi Tribunal.
Prosesu nee prezide husi Juiz Estajiadu Rozito Guterres, Ministeriu Publiku reprezenta husi Prokurador nain ida, arguidu sira hetan asistensia legal husi Advogadu Privadu.
(ter)
