DILI, STLTIMORLESTE.com – Padre Rikardus Pasang, SVD harohan ba Maromak atu akompanha vitima sira rai nakdoko iha nasaun Vizinhu Flores, Indonezia.
Padre Rikardus ba STL Segunda nee (17/08/2026) liu husi nia mensajen ba publiku hotu nafatin reza ba vitima sira neebe dadaun ho fuan rahun tanba lakon familia, no lakon sasan tanba impkatu husi rai nakdoko no tsunami neebe akontese iha Flores.
Ho fuan rahun no solidaridade, Padre. Rikardus Pasang, lidera orasaun espesial ba vítima sira husi dezastre rai nakdoko iha Flores. Iha nia orasaun, Padre husu ba Aman Kbiit Nain atu hakuak ema sira neebe lakon sira nia família.
Ba família sira neebe lakon aman, inan no oan, nia husu Maromak atu hamoos sira nia matan been no sai forsa ba sira iha tempu susar. Nia mos konvida fíel sira atu husu Santa Maria, Inan Konsolasaun ba ema Triste sira, atu harohan ba sira.
“Aman Kbiit-Nain, Ohin ami mai hasoru Ita boot ho fuan neebe rahun no matan been. Rai Flores neebe Ita haraik bensaun agora nakdoko, no uma sira neebe uluk nakonu ho hamnasa agora nakdoko. Ami aprezenta ba Ita boot. Ba ami nia maun alin sira neebe terus, Oh Aman, hakuak sira iha Ita nia hirus matan. Ba família sira neebe lakon aman, inan, oan no ema neebe sira hadomi, hamoos sira nia matan been halo sira Sai forsa bainhira sira sente fraku liu. Santa Maria, Inan Konsolasaun ba ema Triste sira, harohan ba sira, ba vítima sira neebe kanek, Nai Jesus, Mediku Divinu, kona sira nia isin neebe rahun. Hametin doutor, enfermeiru no voluntariu sira neebe tau matan ba ema kole sira. Fo kura perfeitu, no pasiensia iha períodu rekuperasaun. Keta husik sira sente mesak iha kama ospital nian,” harohan husi Padre Rikardus.
Iha biban nee Padre harohan ba sira neebe mate no dadaun nee isin sei taka hela ho rai ho Jesus simu simu iha Nain nia kadunan Santo rohan laek.
“Ba sira neebe sei hakoi hela iha rai-rahun nia okos. O Espíritu Santu, Ita hatene klamar ida-idak iha neebe, fo forsa ba ekipa hodi kontinua buka. Fo iis no esperansa ba sira neebe sei moris nafatin. Se Ita bolu sira, simu sira ho dame, se Ita fo moris ba sira, haruka sira sai ho seguru. Ba maluk sira neebe trauma, Maromak konsolasaun nian, tama iha tauk neebe maka sei lian nafatin bainhira rai nakdoko, kura memoria sira husi labarik sira neebe hadeer husi mehi aat sira. Halo Hakmatek inan aman nia fuan neebe labele dukur, troka tauk ho Ita boot nia dame neebe ultrapasa komprensaun hotu. Ami mos reza ba ami sira neebe sei seguru hela. Keta husik dezastre ida nee halo ita fo sala ba malu. Hanorin ami atu sai hanesan Maria iha Kana:haree nesesidade no tulun kedas. Haraik mai ami fuan laran luak hodi fahe ai-han, tenda, no esperansa. Fo ba ita-nia líder sira prezente konsellu no forsa atu harii fila fali Flores ida neebe metin liutan,” harohan husi Padre.
Iha biban nee Padre mos harohan ba Santa Maria neebe hamriik aas iha Krus nia okos, akompanha sarani idak idak.
“Ita hatene sentimentu lakon no hein iha nakukun laran. Lori ami hosi ruin ba moris-hias. Husi matan-been ba Magnificat foun ida. Ami husu buat sira nee hotu tanba Kristu, ami nia Nai no Intersesor, neebe ho Ita no Espíritu Santu moris no ukun, agora no ba nafatin. Amen. Santa Maria, Nasaun Hotu nia Inan, proteje Flores. Saun Mikael Arkanju, hein ami Amen,” harohan husi Padre Rikardus.
Ba vítima sira neebe kanek, Padre Rikardus husu ba Nai Jesus, Mediku Divinu atu kona sira nia isin neebe rahun. Nia mos fo forsa ba doutor, enfermeiru no voluntariu sira neebe tau matan ba ema kole sira iha ospital.
Nunee mos Padre Paul Kerans SVD husu ema idak idak neebe dadaun nee hasoru hela terus no susar nafatin laran metin ba Jesus tanba Jesus mak hun no rohan laek.
Padre husu ba Maromak atu hanorin ema hotu atu sai hanesan Maria iha Kana “haree nesesidade no tulun kedas. Nia mos husu bensaun ba líder sira no Forsa atu harii fila fali Flores ida neebe metin liu tan.
(eme)
