DILI, STLTIMORLESTE.com – Prezidente Republika (PR), Jose Ramos Horta durante nia mandatu buka apoiu povu kiik sira neebe halo negosiu kiik nomos ema neebe hili lixu iha sidade nomos munisipiu.
Prezidente Republika (PR), Jose Ramos Horta hatete, durante nia mandatu sempre apoiu povu kiik sira neebe presiza tulun, hanesan sira neebe halo negosiu kiik nomos ema neebe hamoos lixu, ida nee ba Prezidente Republika importante tebes.
Aleinde nee tuir komunikadu neebe STL asesu husi media Prezidensia Republika Segunda nee (17/08/2026) hatete, ekipa husi Prezidensia Republika apoia inisiativa negosiu kiik ba ema sira neebe hili lixu iha tibar.
Iha esforsu kontínuu atu foti nível moris komunidade vulneravel sira, Prezidensia Republika liu husi kolaborasaun ho Grupu Voluntariu Australianu (Feto Hamutuk), ho orgullu apoia distribuisaun material negosiu ba feto nain 47 iha Suku Tibar, Munisípiu Liquiça.
Ekipa nee lidera husi Unidade Empoderamentu Ekonomiku ba Feto husi Prezidensia Republika, inisiativa nee fornese ekipamentu esensial inklui meza, kadeira, buli eletroniku, sanan tein-etu eletrika (rice cooker), no ventoinha neebe adapta hodi ajuda feto sira nee estabelese ka haburas sira nia negosiu kiik rasik.
Eventu entrega nee selebradu hanesan pasu vital ida hodi haburas dezenvolvimentu ekonomiku baziku no auto-sufisiensia.
Iha biban nee Asesora Prinsipal ba Unidade Empoderamentu Ekonomiku ba Feto, Iram Saeed, destaka katak objetivu prinsiapal husi distribuisaun nee mak atu fornese alternativa ekonomika neebe sustentavel ba feto sira neebe dadaun nee servisu nuudar ema neebe hili lixu iha lixeiru Tibar.
Hafoin tuir formasaun dedikadu ba negosiu, programa nee iha objetivu atu prepara feto sira nee hodi jere kios kiik ka faan dose no hahan tasak, atu nunee ikus mai bele afasta sira husi servisu perigozu iha lixeiru.
“Karik negosiu segundu lao diak, ita labele ba fali hili lixu,” dehan Asesora Prinsipal ba Unidade Empoderamentu Ekonomiku ba Feto, Iram Saeed.
Saeed hodi fo hanoin fali inisiativa nia kompromisu atu tau prioridade ba sira nia moris diak no independensia ekonomika iha prazu naruk.
Bainhira entrega lideransa lokal espresa sira nia apresiasaun klean ba apoiu kolaborativu husi governu no voluntariu internasional sira.
Lideransa hatoo agradesimentu ba organizador sira no husu ba benefisiariu sira atu simu tulun nee ho espíritu unidade nian. Hodi rekonhese katak sasan sira neebe distribui nee la hanesan, depende ba planu negosiu husi feto ida idak, nia enkoraja komunidade atu tau atensaun ba gratidaun no objetivu konjuntu atu harii futuru neebe nabilan liu no auto sufisiente ba sira nia família.
(eme)
