AINARO, STLTIMORLESTE.com — Xefe Suku Mau-Ulo, Luís Valadares Colaço, afirma katak valor no sakrifísiu husi guerrilheiru FALINTIL sira, sai hanesan mahein no riin ba ukun rasik aan neebe povu Timor Leste goza daudaun ohin loron.
Deklarasaun nee hatoo husi Lideransa Komunitariu nee, hodi komemora Loron FALINTIL neebe monu iha loron 20 fulan Agostu tinan nee.
Luís Valadares Colaço esplika, loron historiku nee Fo hanoin hikas tempu okupasaun bainhira fuzilamentu no invazaun hosi militar Indonezia nian tama iha rai-laran, neebe asuwain sira lakohi hakruuk no hili atu funu hodi defende ho kbiit hotu.
“Iha tempu okupasaun Indonezia invade Timor-Leste, asuwain sira lakohi fo ulun ba nasaun Indonezia atu ukun rai nee. Tanba nee mak sira forma forsa FALINTIL hodi eziste no luta kontra forsa Indonezia dumante tinan 24, komesa husi 1975 too 1999,” dehan Luís Colaço ba STL, iha Ainaro, Tersa nee (18/08/2026).
Tanba tuir nia valor no sakrifísiu boot husi gerilleiru sira mak sai fundasaun metin ba liberdade neebe populasaun Timor Leste goza daudauk, iha Republika Demokratika Timor Leste (RDTL) nia okos.
Lideransa Suku Mau-Ulo nee mos enkoraja jerasaun foun no jerasaun patriota sira atu kontinua habelar historia nee, no fo omenajen boot ba eroi sira neebe dedika an too mehi independensia nee sai realidade.
“Hanesan jerasaun patriota, tenke nafatin firme iha aman luta nain FALINTIL sira nia ain fatin. Kongratula tebes tanba sira nia mehi sai duni realidade. Parabens ba Loron FALINTIL 20 de Agostu, sira nia luta mak foin-sae sira goza,” nia konklui.
Iha fatin ketak, Observador Polítika, Antônio Magno avalia da Silva, katak mensajen no apelu husi lideransa komunitariu sira iha Loron FALINTIL iha papél kritiku hodi habelar valor sivismu no patriotizmu ba foin-sae sira, liu-liu iha tempu mudansa jerasaun no dezafiu sosio-ekonomiku nian.
“Hau haree katak apelu husi lideransa komunitariu sira nee importante tebes hodi hanoin hikas sakrifísiu neebe asuwain sira husik hela, nunee jerasaun foun sira la bele haluha historia no kontinua kaer metin valor patriotizmu ba futuru nasaun nian,” dehan Antônio.
Entretantu, Akademista husi Universidade da Paz (UNPAZ), Alarico de Araújo, sublina katak momentum komemorasaun nee laos deit festa ritual tinan-tinan nian, maibe tenke transforma ba polítika dezenvolvimentu neebe lori benestar no prosperidade ba populasaun kbiit-laek sira iha sidade no rural.
“Ita la bele haree loron 20 Agostu nee hanesan deit serimonia baibain, maibe tenke sai biban atu reflete no kria programa neebe dudu duni mudansa ba povu nia moris,” dehan Alarico.
(car)
