BAUCAU, STLTIMORLESTE.com – Selebrasaun aniversariu FALINTIL ba dala 51 ho tema sentral, “Reafirma Juramentu no Kompromisu ba Pas no Estabilidade”.
Deklarasaun nee hatoo husi Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” ba jornalista sira hafoin remata Misa Solene hodi komemora aniversariu FALINTIL ba dala 51, iha Igreja Paroquia Santo António, Vila Antiga Baucau, Tersa (18/08/2026).
“Selebrasaun 51 anos aniversariu FALINTIL ho tema sentral mak ita reafirma ita nia juramentu no kompromisu ba pas no estabilidade. Tema Uma Marsa, Uma Sema da Palma mak sombolu rekonsiliasaun. Ita hahu marsa ida nee ho objetivu atu rekonsilia malu, laos atu hamate, maibe atu rekonsilia ho ema moris,” dehan Tenente Jenerál Domingos Raúl.
Nia informa, desizaun hili Foho Matebian nuudar fatin prinsipal ba komemorasaun Loron FALINTIL ba dala 51 iha objetivu atu fo rekonesimentu ba eroi no martir sira neebe durante luta libertasaun nasional, fo sira nia sakrifisiu ba nasaun.
“Ita halo serimonia nee iha fatin istoriku sira nee, hanesan fo rekonhesimentu ba ita nia eroi no martir sira neebe ita haluha. Ita hotu fo parabens no obrigadu,” dehan nia.
Falur katak, komemorasaun aniversariu FALINTIL ba dala 51 tenke sai ezemplu no fonte inspirasaun ba membru F-FDTL, liu liu iha kompreensaun kona ba istoria luta no valor patriotizmu.
“Hau hanoin iha tempu halo tranzisaun nian, halo ilustrasaun no rekuperasaun memoria luta libertasaun, liu husi ensinamentu no kursu, formasaun, ao mesmu tempu halo vizita de estudu,” nia hateten.
Tenente Jenerál Domingos Raúl hein katak, prinsipiu no doutrina kona-ba istoria luta libertasaun nasional nee bele kuda metin iha membru F-FDTL sira nia hanoin no neon, hodi hametin espiritu patriotizmu no nasionalizmu.
“Hau hein katak ita bele kuda doutrina ida nee ba sira hotu nia hanoin, neon no fuan, ho espiritu patriotizmu no nasionalizmu,” nia konklui.
(tom)
