DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru interogatoriu, deside aplika medida internamentu ba iha arguidu ho inisial AS.
Arguidu submete mai iha Tribunal, Prokurador turnu Nelson promove ho krime tolu, Tentativa Omisidiu, Ofensa Grave no Arma Branka.
Juiz turnu Jose Quintão rona tiha arguidu nia deklarasaun remata, solisita ba iha Prokurador no defeza atu tama ba iha alegasaun.
Liu husi alegasaun, Prokurador Nelson husu Tribunal atu aplika medida Prizaun Preventiva ba iha arguidu. Enkuantu husi parte defeza nian, haree ba arguidu nia kondisaun neebe iha, husu Tribunal atu aplika medida internamentu ba iha arguidu.
Rona tiha alegasaun, Juiz haree katak arguidu sofre moras, tanba nee Juiz turnu deside aplika medida internamentu ba iha arguidu.
“Arguidu sofre moras oituan hahu kedan nia sei kiik, tanba nee mak Tribunal tetu atu halo prevensaun, Tribunal deside aplika medida internamentu ba iha arguidu tau iha Prizaun, hodi hetan tratamentu,” d3han Defeza arguidu nian, Jose Maria Guterres ba STL iha Kaikoli, Kuarta (19/08/2026).
Nia hatutan, arguidu tau iha Prizaun maibe medida internamentu atu bele hetan tratamentu husi doutor sira. No medida nee mos atu asegura arguidu, se husik deit arguidu hela iha liur, bele kria tan problema foun, tanba dadaun nee arguidu hanesan ema neebe la dun normal.
Tuir kronolojia katak, momentu iha loron Domingu madrugada iha festa serimonia prenda, neebe halao iha Aldeia Leibodu, suku Delesu, Postu Administrativu Railako, munisipiu Ermera.
Momentu neeba ema halao serimonia no festa hela, arguidu kaer samurai ida halai tama ba hodi tenta taa vitima nain tolu, rua hetan kanek kaman iha ida maka kanek grave.
Prosesu primeiru interogatoriu nee, prezide husi Juiz Jose Quintao, Ministeriu Publiku reprezenta husi Prokurador Nelson, arguidu hetan asistensia legal husi Defensor Publiku Jose Maria Guterres.
Tuir observasaun STL nian, arguidu lori mai iha Tribunal akompana husi Polisia Eskuadra Railako, no despaisu Tribunal nian tun arguidu lori kedan ba iha Prizaun Bekora, kumpri medida internamentu neebe iha.
(ter)
