DILI, STLTIMORLESTE.com – Komunidade no pasiente sira tau fiar nafatin ba iha parte saude, tanba bainhira sente moras tenke mai halo konsulta ho pesoal saude para bele hatene tuir moras, maske aimoruk balun laiha maibe ema idak-idak presiza hatene tuir sira kondisaun saude.
Pasiente Amau do Rego hatete, hanesan sidadaun no povu iha rai ida nee, nia tau fiar metin nafatin ba parte saude, liu-liu ba pesoal saude infermeiru no mediku sira, tanba bainhira sente moras ruma tenke mai duni hasoru sira iha sentru saude para konsulta no hatene tuir ema idak-idak nia kondisaun saude.
Nia hatete, nia mai konsulta iha Sentru Saude Komoro tanba hela iha suku ida nee nian. Nia moras iis boot, nee mak familia lori lalais mai emerjensia hodi suas. Depois suas doutor fo reseita hodi simu aimoruk, maibe aimoruk salmutamol ba iis boot laiha, neebe simu deit mak masa bomba.
“Aimoruk salmutamol ba iis boot laiha, maibe sente diak oituan tanba suas ona iha emerjensia. Aimoruk neebe laiha sira troka fali deit ho masa bomba, bainhira iis boot sae bomba deit masa ba ibun. Dala ruma ohin loron aimoruk nee mak hotu duni, maibe loron seluk mai iha fali ona. Neebe tau metin nafatin fiar ba saude, tanba bainhira sente moras ita sei halai mai sira,” dehan nia ba STL iha Sentru Saude Komoro, Kinta (20/08/2026).
Nia katak, antes nee bainhira iis boot sae mai konsulta aimoruk nee sempre iha hela deit. Dala ruma foin fulan nee mak hotu, espera ba oin aimoruk nee bele iha fali ona.
Nunee mos Pasiente Anina Rego hatete, nia mai konsulta iha sentru saude nee tanba sente isin manas no kustupadu. Mai hasoru doutor sira hodi konsulta para hatene tuir moras neebe iha. Depois konsulta hotu mediku fo reseita hodi simu aimoruk iha farmasia. Aimoruk neebe doutor fo nee iha hotu mak vitamina no parasetamol.
“Hau sente diak bainhira mai konsulta no hasoru doutor sira, hodi esplika hau nia moras sira nee. Tanba bainhira moras iha uma deit, ita sei la hatene tuir moras saida mak mosu mai. Neebe so liu husi konsulta ho pesoal saude sira mak bele identifika ita nia moras sira nee,” dehan nia.
Nia haktuir, aimoruk neebe antes nee maluk balun mai konsulta laiha, agora iha fali ona. Hanesan vitamina iha fulan rua kotuk liu ba laiha, mais agora iha fali ona.
Nunee mos Inan oan nurak Anastasia Amaral Soares dehan, ho nia kaben lori fali bebe mai simu vasina semana ida nian. Depois vasina inan ho bebe nee simu hahan nutrisaun super sereal busi pesoal saude sira hodi konsumu iha uma, atu nunee bele ajuda inan nia susuben ba bebe.
“Hau sente kontente tanba ohin mai vasina bele simu super sereal plastik haat hodi han ba fulan ida nian. Tanba iha oan ida primeiru nee lae, maibe ohin pesoal saude sira husu nia livru moris nian para bele simu hotu hahan super sereal nee,” nia tenik.
Nia hatutan, sereal nutrisaun neebe sira cahe kada inan ho bebe ida simu plastik 4, hodi konsumu ba fulan 1 nia laran. Depois hotu dia 20 nia simu ka fori fali iha sentru saude nee.
Nia katak, dala ruma iha uma ladun konsumu hahan neebe iha nutrisaun, tanba osan laiha atu sosa. Neebe ho sereal nutrisaun nee bele ajuda inan isin rua sira husi fo susu bebe. Tanba pesoal saude sira dehan susubeen inan mak hanesan vasina dahuluk.
(dom)
