DILI, STLTIMORLESTE.com – Ensinu Baziku Central (EBC) Manleuana selebra loron FALINTIL-Forsa Defeza Timor Leste (F-FDTL) neebe selebra aniversariu ba dala 51, husu estudantes sira atu banati tuir luta nain sira nian sakrifisiu ba ukun rasik aan ida nee.
Lia hirak nee hatoo husi Diretor Ensinu Baziku Central (EBC), Carlos Correia ba jornalista STL iha nia knaar fatin, Kinta nee (20/08/2026).
“Ohin ami hamutuk ho profesor no ami nian estudantes sira selebra loron FALINTIL, neebe selebra kompleta ba 51, nee duni ohin ami selebra loron nee liu husi isar bandeira iha ami nian eskola, dala ida tan parabens ba ita nian luta nain sira neebe ho sira nian sakrifisiu tomak, nee duni ohin hau husu ba hau nian profesores no estudantes sira katak, oinsa ita atu banati tuir ita nian luta nain sira,” nia dehan.
Carlos dehan, ohin isar bandeira hodi selebra loron FALINTIL ba dala 51 ida nee hetan partisipasaun husi profesores no estudantes sira husi eskola refere, liu-liu estudantes sira tenke hakas aan estuda, tanba sira mak joven neebe sai futuru diak ba aban bainrua nian, husu atu banati tuir luta nain sira nee.
“Ita boot sira mak jerasaun foun, husu ita atu banati tuir saida mak ita nian luta nain sira halo ona ba ita nian rai, nee mak husu ita boot sira tenke estuda, dala ida tan parabens ba ita nian luta nain sira hotu,” nia esplika.
(jac)
