DILI, STLTIMORLESTE.com – Maioria komunidade ne’ebé durante ne’e hela iha areadór eskola ensinu báziku, agora sai ona husi fatin sira ne’e. Maibé, iha Eskola Sekundáriu no Ensinu Sekundáriu Tékniku no Vokasionál (ESTV), komunidade balun sei kontinua hela iha areadór eskola.
Superintendente Edukasaun Munisípiu Dili, Cesarina C. Guterres, hatete ba STL, Tersa (25/08/2026) katak, rezultadu husi inspetór no inspetora sira hatudu katak maioria komunidade ne’ebé okupa areadór eskola ensinu básiku sai ona.
“Hau hanoin ita-nia rezultadu husi inspetór no inspetora sira relasiona ho komunidade sira ne’ebé sei okupa, hatudu katak komunidade ne’ebé hela iha areadór eskola ensinu básiku maioria sai hotu ona. Maibé, iha eskola sekundáriu no ESTV, sei iha komunidade balun ne’ebé hela,” nia informa.
Cesarina fó ezemplu Eskola Sekundáriu Jeral (ESG) 4 de Setembro no eskola sira seluk. Tanba ne’e, nia husu media sira atu kontaktu diretamente Diretór Servisu Edukasaun Munisípiu Dili, hodi hetan esplikasaun ne’ebé klaru kona-ba situasaun komunidade sira ne’ebé sei hela iha areadór eskola.
Iha parte seluk, Diretór Nasionál Ensinu Sekundáriu iha Ministériu Edukasaun (ME), Benjamin Gomes da Cruz Fernandes hatete katak, asuntu kona-ba okupante sira ne’ebé to’o agora sei hela iha areadór eskola, kompeténsia husi Servisu Edukasaun Munisípiu Dili no SEATOU atu haree no rezolve.
“Hau hanoin kona-ba okupante sira iha areadór eskola, ne’e kompeténsia Edukasaun Munisípiu Dili. Sira mak iha kompeténsia. Ami iha liña koordenasaun ne’ebé diak ho sira no ami nafatin fó kompeténsia ba sira atu bele haree asuntu ida ne’e,” dehan Benjamin.
Benjamin akresenta katak, tanba iha eskola sekundáriu balun iha Dili ne’ebé komunidade sei hela iha areadór eskola, asuntu ne’e sei fó ba Diretór Servisu Edukasaun Munisípiu Dili no parte SEATOU atu haree.
“Ita nafatin husu ba parte ne’ebé ohin mensiona, sira mak iha kompeténsia hodi haree komunidade ne’ebé hela iha areadór eskola. Maibé, iha eskola balun, komunidade sira hahú sai ona husi fatin,” dehan nia.
Enkuantu ne’e, Diretur Eskola Sekundáriu Jeral N.° 4 de Setembro Balide, Sergio A. da Cruz, husu Ministériu Edukasaun (ME) atu rezolve ho urjénsia problema okupante sira ne’ebé hela iha areadór eskola.
“Difikuldade ne’ebé ami enfrenta daudaun ne’e mak komunidade hela iha eskola laran no sira seidauk sai. Sira-nia oan lao ba mai iha oin sala aprendizajen, no ami-nia profesór sira mós enfrenta situasaun ne’e. Ami husu ba parte kompetente atu rezolve ho emerjénsia, liuhusi esforsu hamutuk hodi hadi’a situasaun ne’e,” tenik nia.
Sergio hatutan katak, bainhira komunidade sei hela iha resintu eskola, prosesu ensinu no aprendizajen bele hetan perturbasaun, tanba komunidade sira halo movimentu tama no sai iha areadór eskola durante atividade eskolar.
(jac)
