DILI, STLTIMORLESTE.com — Bainhira atu foti kaderneta eskolar husi Ministériu Edukasaun (ME), eskola tenke haree uluk ba lista naran estudantes sira atu asegura katak material ne’ebé simu tuir númeru estudantes iha eskola.
Koordenadora Pre-Eskolar Moris Foun I, Domingas Beatriz da Cunha hatete katak, agora kaderneta eskolar no livru sira sufisiente hela ba estudantes sira. Maibé, bainhira atu foti material hirak ne’e, eskola tenke haree uluk ba lista estudantes.
“Konaba ami nia livru no kaderneta, bainhira ami atu foti kaderneta, ami tenke haree ba lista estudantes. Material sira ne’e ami bele uza tuir konsesaun eskolar. Tanba bainhira ami ba foti kaderneta no livru, tenke haree lista estudantes ne’ebé iha eskola,” nia dehan.
Nia hatete katak lista estudantes importante atu determina quantidade material ne’ebé eskola presiza, tanba livru no kaderneta sira distribui tuir númeru estudantes.
Iha fatin seluk, Koordenador Gabinete Unidade Kurrikulu Nasional iha ME, João Mau Pelu, hatete katak Ministériu Edukasaun, liuhusi Unidade Kurrikulu Nasional, kontinua imprime livru no kaderneta iha Sentru Impresaun.
“Primeiru, livru no kaderneta ita sei halo impresaun, no balun ita distribui tiha ona. Livru ba setimu ano nian ita distribui hotu ona. Kuaze kada disiplina ita imprime 27 mil, ne’ebé ita kalkula besik atu kobre estudantes ida-idak. Maibé, karik eskola balun seidauk simu ka seidauk kobre estudantes ida-idak, ita husu ba eskola atu halo jestaun,” nia informa.
João Mau Pelu husu ba eskola ida-idak atu halo jestaun diak ba livru ne’ebé iha, inklui fahe livru ba grupu estudantes atu uza hamutuk no halo diskusaun, bainhira quantidade livru seidauk sufisiente.
Nia hatete katak, ba estudante sira ne’ebé uza livru iha grupu, importante atu livru sira uza didiak durante prosesu aprendizajen no, bainhira tempu remata, estudantes sira tenke entrega fali livru ba eskola.
“Ba oitavu ano, iha fim do ano ita sei imprime 27 mil kada disiplina. Iha disiplina sanulu, la inklui relijiaun, kada livru ita imprime 27 mil. Ita nia planu mínimu sei kobre estudante ida livru ida. Maibé, se la too, hanesan ohin, eskola halo jestaun grupu atu estudantes uza livru hamutuk,” nia hatete.
Nia mos husu ba professores sira atu fó livru ne’ebé iha eskola ba estudantes sira atu uza, no labele husik livru sira iha biblioteka deit. Livru hirak ne’e tenke uza hodi apoia prosesu aprendizajen no depois entrega fali ba eskola, atu estudantes sira iha tinan tuir mai bele uza.
Enkuantu ne’e, Diretor Eskola Sekundária Jerál 10 de Dezembro Comoro, Manuel Verdial, hatete katak kaderneta eskolar ba estudantes sira iha eskola ne’e sufisiente no laiha problema.
“Konaba kaderneta eskolar mos kompletu ona, laiha impaktu ba ida ne’e. Livru mak sei iha impaktu. Maibé, ita konsulta ona ho parte ME nasional, liuliu parte lojístika no distribuisaun livru sira, atu bele kompleta livru ba disiplina ne’ebé sei menus,” dehan Manuel Verdial.
Nia hatete katak, livru ba disiplina balun, inklui Língua Inglesa, sei menus iha eskola. Tanba ne’e, eskola sei kontinua husu apoiu husi ME atu fasilita estudantes no professores sira iha prosesu aprendizajen.
“Ami nia livru ba Língua Inglesa, hau hanoin iha biblioteka sei menus balun. Ami nia kaderneta kompletu hela. Hanesan ohin hau dehan ona, ami nia kaderneta sira laiha problema,” nia dehan.
(jac)
