DILI, STLTIMORLESTE.com – IX Governu Konstitusionál estabelese ona kooperasaun bilateral ho nasaun sira iha ASEAN, Amerika no seluk tan, hodi fo bolsu estudu ba Timor oan sira estudu iha rai liur.
Lia hirak nee hatoo husi Vise Primeiru Ministru MCAE-MTA, Francisco Kalbuadi Lay liu husi nia diskursu iha loron daruak husi Simeira Siénsia ba Dezenvolvimentu iha CCD Tersa (25/08/2026).
Nia hatete, IX Governu Konstitusionál liu husi Fundu Dezenvolvimentu Kapitál Umanu, estabelese ona programa sira ne’ebé fó oportunidade ba sidadaun Timor-Leste, liuliu joven sira, atu kontinua edukasaun superiór iha universidade sira ne’ebé kualifikadu iha ASEAN, no mós iha Portugal, Brasil, Moçambique no nasaun sira seluk.
“Governu mós estabelese ona kooperasaun bilateral ho nasaun sira, inklui Estadus Unidus Amérika, Austrália, Nova Zelándia, Japaun, Repúblika Korea, Indonézia, Estadu Membru ASEAN, Xina no nasaun sira seluk,” dehan Visi PM.
Kooperasaun sira-ne’e inklui programa bolsa-estudu ba estudante Timor-oan talentozu atu kontinua estudu ba grau lisensiatura, mestradu no doutoramentu iha área siénsia no akademia oioin.
“Nu’udar rezultadu, ita agora iha númeru graduadu no joven profisionál sira ne’ebé kontinua aumenta, ne’ebé hetan ona koñesimentu no esperiénsia husi universidade sira iha mundu tomak. Barak husi sira agora kontribui ona ba ita-nia nasaun liuhusi sira-nia servisu iha instituisaun Governu, organizasaun dezenvolvimentu internasionál, setór privadu, sosiedade sivíl no organizasaun la’ós governamentál,” katak Visi PM.
Investimentu iha kapitál umanu ne’e reprezenta ida husi baze importante liu ba futuru dezenvolvimentu Timor-Leste. Maibé, investimentu iha edukasaun no kapitál umanu tenke akompaña ho kapasidade atu transforma koñesimentu sai solusaun prátika ba dezafiu sira ne’ebé nasaun hasoru.
“Tuir dadus husi Banku Sentral Timor-Leste, iha tinan 2025, ita-nia nasaun importa sasán ho valór besik US$960 miliaun, inklui kuantidade boot husi ai-han hanesan etu. Ida-ne’e hatudu katak seguransa ai-han nasional sei sai dezafiu ida ba ita, no demonstra nesesidade atu hametin produsaun domestika no setór produtivu sira seluk. Tanba ne’e, ohin hau hakarak hato’o pergunta balu atu ita hotu reflete hamutuk. Ideia saida mak bele funsiona iha ita-nia realidade? Kapasidade saida mak ita presiza harii? Iha área saida mak esperiénsia internasionál bele ajuda ita? No parseria saida mak ita bele hahú husi agora?”katak Visi PM.
(eme)
