DILI, STLTIMORLESTE.com – Inspetor eskolar sira hala’o monitorizasaun ba atividade sira ne’ebé hala’o iha eskola, liuliu eskola sira ne’ebé lokaliza iha Munisípiu Dili. Inspetor sira mos nafatin halo liña kordenasaun diak ho diretor eskola ida-idak.
Superintendente Edukasaun Munisípiu Dili, Cesarina C. Guterres, dehan ba STL iha nia knaar fatin, Kuarta (26/08/2026), katak monitorizasaun ne’e inklui prosesu ensinu-aprendizajen, programa merenda eskolar, fasilidade eskola no atividade manorin sira nian.
“Ita-nia inspetor eskolar sira hala’o monitorizasaun ba ita-nia atividade iha eskola sira, hanesan atividade prosesu ensinu-aprendizajen, programa merenda eskolar, fasilidade eskola no manorin sira ne’ebé hanorin iha eskola,” dehan nia.
Nia hatete, atividade hotu-hotu ne’ebé hala’o iha eskola sei hetan monitorizasaun husi inspetor eskolar. Paralelamente, sira nafatin halo liña koordenasaun ho diretor eskola ida-idak atu bele fahe informasaun kona-ba asuntu no difikuldade sira ne’ebé eskola hasoru.
“Ita-nia liña koordenasaun servisu ho parte eskola sira importante tebes, tanba atu servisu lao diak, ita presiza kordena malu. Ho nune’e, ita-nia servisu bele lao diak liután. Nee duni, ita-nia inspetor no inspetora sira monitoriza ita-nia eskola sira, husi edukasaun pre-eskolar, ensinu baziku, sekundáriu no tékniku vokasionál,” nia dehan.
Iha fatin seluk, Diretor Servisu Edukasaun Munisípiu Ainaro, Patricio da Costa Magno, dehan Servisu Edukasaun Munisípiu Ainaro nafatin halo kordenasaun servisu ho lideransa eskola, inklui direitor eskola sira.
“Nuudar Diretor Edukasaun Munisipál Ainaro, hau nafatin halo koordenasaun servisu ho lideransa husi eskola sira ne’ebé lokaliza iha Munisípiu Ainaro, tanba liña kordenasaun ne’e importante tebes. Bainhira iha asuntu importante ruma, presiza fó informasaun ba malu, no bainhira iha difikuldade saida deit mak eskola sira hasoru, tenke fó informasaun. Tanba ne’e, presiza iha kordenasaun ne’ebé diak ho direitor eskola sira,” dehan nia.
Nia akresenta, bainhira eskola sira falta fasilidade ruma ka hasoru asuntu importante, sira presiza relata mai Servisu Edukasaun Munisipál atu bele hato’o informasaun ba Ministériu Edukasaun.
Entretantu, Diretor Servisu Edukasaun Munisípiu Liquiçá, Julio da Silva, hatete liña kordenasaun ho direitor eskola sira lao diak, tanba sira sempre halo kontaktu liuhusi grupu edukasaun.
“Ita sempre halo kontaktu iha grupu edukasaun nian. Dala ruma mos, liuhusi enkontru sira, ita fó informasaun importante, liuliu liga ba servisu. Nee tenke fó hatene ba malu, ho nune’e bele relata ba nível nasional,” dehan nia.
Nune’e mos Diretor Servisu Edukasaun Munisípiu Bobonaro, Miguel Freitas, dehan inspetor sira husi nível pre-eskolar, ensinu baziku, sekundáriu no tékniku vokasionál nafatin hala’o monitorizasaun ba eskola sira ne’ebé lokaliza iha Munisípiu Bobonaro.
“Ita-nia inspetor sira husi nível pre-eskolar, ensinu baziku, sekundáriu no tékniku vokasionál nafatin monitoriza eskola hirak ne’ebé lokaliza iha Munisípiu Bobonaro, atu nune’e bele identifika mos manorin sira ne’ebé iha eskola sira,” nia haktuir.
(jac)
