DILI, STLTIMORLESTE.com – Ministériu Edukasaun (ME) hamutuk ho Ministériu Obras Públikas (MOP) tinan ne’e halo ona konstrusaun foun ba edifísiu eskola hamutuk hitu (7) iha Munisípiu Ainaro.
Informasaun ne’e hato’o husi Diretor Servisu Edukasaun Munisípiu Ainaro, Patricio da Costa Magno, ba STL liu husi telefone, Kuarta (26/08/2026).
“Dadus ami nian hatudu katak eskola sira la hetan estragu husi anin boot durante ne’e. Maibé agora dadaun eskola hitu mak iha faze konstrusaun foun. Estadu hahu halo ona eskola balun hodi aumenta sala aprendizajen ba estudantes sira. Tinan ne’e halo konstrusaun foun ba eskola sira,” dehan nia.
Nia esplika katak eskola hitu ne’e kompostu husi Ensinu Baziku Filial (EBF) no Ensinu Baziku Sentral (EBC) ida, inklui Pré-eskolar ida. Husi eskola hitu ne’e, tolu mak MOP halo konstrusaun, enkuantu haat seluk mak ME.
Patricio dehan, konstrusaun ba eskola hitu ne’e foin hahu, enkuantu fasilidade hanesan meza no kadeira balun rezolve ona. Fasilidade seluk sei hein, tanba pedidu ba apoiu hatama ona ba ME.
Nia hatutan katak, iha Munisípiu Ainaro iha liu husi mil profesores, ho total eskola 93 EBF, 46 pré-eskolar, 7 ensinu sekundáriu no 3 ensinu tékniku-vokasionál.
Enkuantu iha Munisípiu Liquiçá, Diretor Servisu Edukasaun Munisípiu Liquiçá, Julio da Silva, dehan servisu ne’e tinan ne’e hatama ona pedidu ba ME atu aumenta fasilidade eskola inklui meza no kadeira, no halo konstrusaun foun hodi aumenta sala aula ba estudantes.
“Konaba fasilidade eskola nian, ita nia Governu liu husi Ministériu Edukasaun durante ne’e sempre ajuda ita nia eskola sira liu husi orsamentu konsesaun eskolar. Hau fiar katak buat ki’ik sira nee ita bele halo hela. Konaba edifísiu sala aula no fasilidade meza no kadeira, Ministériu mak tenke halo,” tenik nia.
Julio hatutan katak pedidu atu aumenta fasilidade no sala aula hatama tiha ona ba ME nasional, atu bele rezolve problema eskola sira ne’ebé to’o agora sei menus sala no fasilidade, hodi fasilita estudantes sira iha prosesu ensinu-aprendizajen.
Iha parte seluk, Diretor EBC Manleuana, Carlos Correia, dehan sala aprendizajen ba estudantes sira iha eskola ne’e sei limitadu, tanba kada sala tenke simu estudantes barak.
“Konaba konstrusaun sala foun ne’e to’o agora seidauk hahu. Ami tenta kontaktu ona parte infraestrutura nasional no parte PAM, maibé sira la atende, tanba ne’e konstrusaun seidauk hahu. Ami nia sala ba estudantes sira sei limitadu hela, tanba kada sala estudantes to’o 60 resin, sira tur besik malu deit hodi partisipa iha prosesu aprendizajen,” dehan nia.
Entretantu, Superintendente Edukasaun Munisípiu Dili, Cesarina C. Guterres, hatete katak eskola balun presiza reabilitasaun, enkuantu eskola balun presiza konstrusaun foun hodi aumenta sala aula.
Nia dehan, medida ne’e importante tanba iha eskola balun sei menus sala aprendizajen ba estudantes sira.
“Ita nia eskola balun presiza halo reabilitasaun, no balun halo konstrusaun foun, hodi bele aumenta sala aula ba estudantes sira, tanba eskola balun presiza aumenta sala aprendizajen ba estudantes sira,” katak nia.
(jac)
