DILI, STLTimorLeste.com – Jesus konvida fiar-na’in sira atu matan moris no prepara aan, la’ós atu halibur rikusoin, maibé moris ho domin no servisu loro-loron.
Tuir Padre Paul Kerans SVD ba STL, Kinta nee (27/08/2026), Evanjellu tuir Mateus 24:42-51 konvida fiar-na’in sira atu matan-moris no prepara an, tanba Oan-Mane sei mai iha oras ne’ebé ema la hein.
“Tan ne’e, keta gasta ita-nia forsa tomak atu buka de’it buat ne’ebé lakon lalais, hanesan rikusoin, sasán ka ksolok mundu nian. Ida-ne’e la’ós buat hotu iha moris. Preparasaun loloos mak ba Jesus nia prezensa,” dehan Padre Paul.
Iha Evanjellu ohin nian, Jesus fó hanoin ba Ninia dixípulu sira atu matan moris, tanba Oan-Mane sei mai iha oras ne’ebé imi la hein. Ida-ne’e la’ós de’it bolun ida atu matan moris, maibé konvite atu moris iha dalan ida ne’ebé reflete Ninia moris.
“Preparasaun saida mak Jesus hakarak husi Ninia dixípulu sira? Ne’e simples. Nia bolu ita atu moris ho haraik aan, hatudu preokupasaun jenuínu ba ema kiak sira, no dedika ita-nia moris hodi serbí ema seluk. Hodi nune’e, ita-nia hahalok loro-loron sai ita-nia preparasaun ba Nia fila-fali,” dehan Padre Paul.
Tuir nia, preparasaun ne’e simples, maibé iha signifikadu kle’an, liuliu moris ho haraik-an, hatudu preokupasaun loos ba ema kiak sira no dedika moris hodi serbí ema seluk.
Nia hatete katak hahalok loro-loron tenke sai parte husi preparasaun ba Jesus nia fila-fali. Tanba ne’e, preparasaun ba Jesus la’ós kona-ba halibur de’it rikusoin, sasán materiál ka buka satisfasaun mundu nian.
Pe. Paul subliña katak preparasaun loloos kona-ba loke fuan ba Jesus, atu bainhira Nia mai no tuku odamatan, ema prontu atu simu Nia.
Nia mós fó hanoin ba fiar-na’in sira atu la gasta forsa no tempu tomak hodi buka buat sira ne’ebé lakon lalais, hanesan rikusoin, sasán no ksolok mundu nian. Tuir nia, buat hirak ne’e la’ós buat hotu iha moris.
“Preparasaun loloos ba Jesus nia mai mak tau tempu ba Nia liu husi orasaun, servisu no hahalok domin nian. Tanba, hodi fó fatin ba Jesus iha moris, ema bele hetan sentidu loloos no objetivu rohan-laek,” dehan Padre Paul.
Pe. Paul konvida fiar-na’in sira atu moris ho atensaun, domin no servisu, tanba ema ne’ebé prontu atu hasoru Jesus la’ós ema ne’ebé halibur buat barak, maibé ema ne’ebé loke nia fuan no moris iha domin ba Maromak no ema seluk.
(eme)
