BAUCAU, STLTIMORLESTE.com – Normalizasaun estrada kilometru 10 resin iha Postu Administrativu Baguia, Munisípiu Baucau, finaliza ona, maibé laiha sustentabilidade ba tempu naruk.
Administrador Postu Administrativu Baguia, Mário Xavier da Silva aprezenta, udan boot ne’ebé akontese iha fulan Maiu 2026 fó impaktu ba estrada ligasaun husi Baguia Vila ba Suku Hae-Coni, Ossohuna no Afaloicai, tanba hetan estragus makaas inklui iha área Basarauai (Suku Hae-Coni) kotu totál, ne’ebé fó impaktu no kria difukuldade ba movimentasaun transporte públiku no privadu durante tempu naruk.
Maibé liuhusi apoiu kombustível (gazóleo) husi Autoridade Munisipal Baucau ba ekipamentu pezadu husi empreza lokál ida iha Baguia, hamutuk ho komunidade sira servisu voluntáriu no apoiu husi Institutu Jestaun Ekipamentu (IGE), ne’ebé servisu normalizasaun refere konsege finaliza iha semana tolu nia laran ho tipu servisu sira mak hanesan aterru no hada bronjong iha mota Basarauai.
“Normalizasaun ne’e hahú husi Baguia Vila tama to’o Afaloicai. Nia progresu ne’e sira finaliza ona, inklui mós mota Basarauai ne’ebé kotu sira halo hotu ona,” hateten Mário Xavier da Silva ba STL liu husi telefóne, Kinta (27/08/2026).
Nia haktuir, obra normalizasaun temporáriu ne’e fasilita hikas ona movimentasaun komunidade sira husi Suku Hae-Coni, Ossohuna, Afaloicai, no mós komunidade sira husi Postu Administrativu Uatucarbau (Munisípiu Viqueque) ne’ebé liu husi dalan refere.
Aliande ne’e, estrada refere mós sei fasilita transportasaun materiál ba projetu Programa Nasionál Dezenvolvimentu Suku (PNDS) 2026 ne’ebé daudaun ne’e la’o iha Suku Ossohuna no Afaloicai, maibé preokupa, tanba estrada refere laiha sustentabilidade.
“Ko’alia kona-ba nia sustentabilidade, iha tempu udan ita la garante, tanba bainhira korente mota boot sei sobu fali. Ne’e fó risku nafatin ba suku rua ne’e,” Mário akresenta.
Kona-ba kestaun ne’e, Autoridade Postu Baguia husu ba Ministériu Obras Públikas (MOP) atu fó atensaun másima ba estrada Baguia Vila—Afaloicai, tanba estrada refere la’ós de’it fó asesu ba suku tolu ne’e, maibé mós konsidera nu’udar estrada nasionál ne’ebé ligadu ba Munisípiu Viqueque.
Nia husu atu MOP foti polítika hodi nahe alkatraun permanente ba estrada refere, nune’e Governu labele gasta orsamentu dalarua (dobru) ba servisu normalizasaun de’it.
(tom)
