DILI, STLTIMORLESTE.com — Ministeriu Ensinu Superior, Siénsia no Kultura (MESSK) afirma katak iha relasaun parseria diak ho instituisaun ensinu superior sira iha Timor-Leste, liu-liu iha área subvensaun públika, formasaun no dezenvolvimentu kualidade ensinu superior.
Diretór Jerál Ensinu Superior no Siénsia, Domingos Barros hatete, kona-ba subvensaun públika ne’ebé MESSK fó ba instituisaun ensinu superior sira, balun ezekuta ona no hatama ona relatóriu ba ministériu.
Nia hatete, atu hetan informasaun kle’an liu kona-ba ezekusaun subvensaun no relatóriu sira, tenke koordena ho parte finansas, tanba parte ne’e mak simu relatóriu husi instituisaun ensinu superior sira.
“Kona-ba subvensaun públika ne’ebé ita fó ona ba ensinu superior sira, depois sira nia relatóriu nee husu ba parte finansas, tanba sira mak simu relatóriu. Ita nia liña koordenasaun servisu ho ensinu superior sira lao diak, tanba sira mak sai parseria diak ho Ministeriu Ensinu Superior. Iha asuntu ruma, nafatin hato’o ba malu,” afirma Domingos ba STL iha nia knaar fatin, Kinta (27/08/2026).
Nia hatete, liña koordenasaun entre MESSK ho instituisaun ensinu superior sira lao diak nafatin, tanba instituisaun sira ne’e sai parseria estratéjiku ba dezenvolvimentu ensinu superior iha Timor-Leste. Kooperasaun no partilla informasaun entre parte rua kontinua hala’o atu hadi’a servisu iha setor ensinu superior.
Enkuantu, Reitór Institutu Siénsia Saúde (ICS), Leão Borges, hatete katak durante ne’e instituisaun ensinu superior sira nafatin halo koordenasaun diak ho Governu, liu husi MESSK.
Nia konsidera, MESSK hanesan parseria importante ba instituisaun ensinu superior sira, liu-liu tanba apoiu liuhusi subensaun públika ne’ebé bele ajuda universidade sira hadi’a kualidade ensinu.
“Hau hanoin durante ne’e instituisaun ensinu superior sira nafatin halo koordenasaun ne’ebé diak ho Governu liu husi Ministeriu Ensinu Superior, Siénsia no Kultura. MESSK hanesan parseria diak ho ensinu superior sira iha rai laran, hodi fó apoiu subsídiu ba universidade, ho nune’e bele hadi’a kualidade iha ensinu superior,” nia informa.
Leão Borges aumenta katak, liña koordenasaun entre MESSK ho instituisaun ensinu superior sira diak, no MESSK kontinua fó orientasaun ba universidade sira atu fó prioridade ba kualidade ensinu. Nia mos subliña nesesidade atu kontinua fó kapasitasaun ba dosente sira.
Aleinde nee, Reitór Dili Institute of Technology (DIT), Salustiano dos Reis Piedade hatete, durante ne’e MESSK fó apoiu liuhusi subensaun públika no formasaun língua Portugés ba dosente sira.
“Durante ne’e ita nia Governu liu husi MESSK fó apoiu subensaun públika, no fó formasaun língua Portugés ba dosente sira. Nee duni, ensinu superior sira iha liña koordenasaun diak ho MESSK,” nia dehan.
(jac)
