DILI, STLTIMORLESTE.com — Eskola hamutuk 50 ne’ebé lokaliza iha Munisípiu Ainaro presiza aumenta profesores, liuliu ba matéria Língua Portugés no Inglés, atu responde ba nesesidade aprendizajen estudante sira iha ensinu báziku no sekundáriu.
Diretór Servisu Edukasaun Munisípiu Ainaro, Patricio da Costa Magno hatete ba STL liuhusi telefone, Kinta (27/08/2026), katak iha eskola balun profesores sufisiente ona, maibé iha mos eskola balun ne’ebé sei presiza aumenta profesores ba matéria balun.
“Iha eskola barak hela, nee bazeia ba kuadru pesoál ne’ebé ita hatama mai. Iha ita nia eskola sekundáriu balun ne’ebé sei aumenta profesores, hanorin Siénsia Sosiais. Iha ensinu báziku ida-rua mak profesor seidauk kompletu. Nee duni ita nia eskola 50 mak presiza aumenta profesores ida-rua nune’e,” nia hatete.
Nia hatutan, nesesidade aumenta profesores liuliu iha área Língua Inglés no Portugés, tantu iha ensinu báziku no sekundáriu. Maibé, eskola seluk iha Ainaro konsidera katak númeru profesores sufisiente hela.
“Ita espera katak, ho rekrutamentu husi ME nee bele responde ba eskola balun iha área remota sira ne’ebé sei menus profesores. La’ós eskola hotu-hotu, maibé balun deit mak atu aumenta profesores,” nia esplika.
Iha parte seluk, Diretór Eskola Sekundáriu Jerál 10 de Dezembru Comoro, Manuel Verdial, hatete katak sira presiza aumenta profesores nain 8 to’o 10 atu responde ba nesesidade iha eskola.
Nia hatutan, eskola halo ona kuadru pesoál no hein profesores foun sira ne’ebé rekrutamentu liuhusi ME, atu bele koloka tuir nesesidade no kuadru pesoál iha eskola.
“Sesenta resin profesores, ami halo ona ami nia kuadru pesoál. Ami hein ita nia profesores sira Bolsa kandidatu nee atu bele koloka mai tuir ami nia kuadru pesoál ne’ebé iha. Ami presiza atu aumenta profesor ba matéria Português, liuliu kuandu ita halo ona alargamentu edukasaun iha nivel territóriu,” nia deklara.
Nia hatete katak iha futuru sira sei presiza tan profesores ba matéria rua ka tolu, tanba profesores nain rua sei tama ba idade reforma. Tanba ne’e, eskola husu atu aumenta profesores entre nain 8 to’o 10.
Enkuantu, Diretór Eskola Sekundáriu Jerál No. 4 de Setembru Balide, Sergio A. da Cruz, hatete katak atualmente professores iha eskola sufisiente, maibé professores nain lima sei tama ba reforma obrigatóriu iha tinan oin.
Nia esplika katak profesores nain lima ne’e idade 65 tinan ka liu ona no hotu-hotu hanorin matéria Portugés.
“Agora daudaun ami nia professores sira sufisiente hela, maibé professores nain lima mak tama iha idade reforma. Sira nia idade 65 sae ba leten. Sira la hatama karta rekerimentu ida. Sira nain lima nee hanorin matéria Portugés. Ami nia professores moras laiha, no idade reforma nian mak ohin hau temi ona nee, iha nain lima ne’ebé tama iha reforma obrigatóriu iha tinan oin,” dehan nia.
Sergio A. da Cruz espera katak, ho vaga rekrutamentu professores ne’ebé ME loke hela, professores foun ne’ebé pasa prosesu seleksaun bele koloka ba eskola sira ne’ebé menus tenaga docente, no substitui professores ne’ebé tama ba reforma.
(eme)
